ايه الاخبار 8
by Hassan Moaaz on Wednesday, August 31, 2011 at 8:01am
الجرنال : حسنكو لاى كلام اليوم: الاربعاء التاريخ: 31/8 /2011 السعر : ببلاش عيد سعيد بقى
الجرنال لا ينتمى الى اى حزب سياسى ولا اى تيار و لا اى" فصييل " واحد يسألنى اى لزمه الكلام ده هقوله بشوفهم بيقوله كده مليش دعوه انا
__________________________________________________________________________________
سياسه:-
فى اليوم اللى المجلس العسكرى نزل البيان رقم 72 اللى كان فيه
تسامح المجلس العسكرى عن كلا من اسماء محفوظ و لؤى نجاتى و اللى طبعا الاعلام استقبله بالطبل و الزمامير كعادتهم و ان المجلس العسكرى ربنا يخليه و انه حكيم و عظيم و الكلام ده كله الرد جيه من اسرائيل المره ديه الحقيقه قتلت 4 5 مصريين على الحدود و الحقيقه الموقف ده كان بيفكرنى بتصريح مسؤلين زمان و كنا كتبنا عنه قبل كده فحبيت استعير الجمله اللى كان قالها المسؤل " الحادث الارهابى خلف خساير بشريه بس الحمد لله كلهم مصريين مفيش اجانب " طبعا الكلام ده كان قبل الثوره و لان مصر قبل 25 غير مصر بعد 25 فكان رد فعل الحكومه و المجلس العسكرى حازم و صارم جدا انهم لن يتهاونو و كرامه المصرى من مصر اه اسف مش ديه دى بتاعه مبارك هما قالو ان دم المصرى غالى جدا و مفيش تفريط فيه و بالنسبه للاجراءات اللى هما عملوها انهم بعته عربات امن مركزى و مدرعات و شرطه عسكريه للسفاره الاسرائيليه ..... اوعى خيالك يروح لبعيد اكييد مش هيمشو السفير يعنى هما بس هيحمو السفاره من اى واحد مش عارف مصلحه البلد ده كان بالنسبه للوضع الداخلى اما بقى للوضع الخارجى فكان حدث ولا حرج اختفاء تاام لوزير الخارجيه المصرى لمده 4 ايام و اجتماع دائم لمجلس الوزراء لبحث الوضع و لكن بعد فتره اجتماع طويله تقريبا كانوا بيصلو فيها التروايح و طلعو روحنا احنا طلع قرارات حاسمه بسحب السفير و لكن للاسف يا فرحه ما تمت طلع اللى كتب و قال الكلام ده اخص علييه كتب غلط بالظبط زى اللى حط صوره مبارك فى الاول و وراه اوباما كده
كان بس مجرد خبر تجريدى !!!!
بالنسبه بقى للوضع فى ليبيا القذافى دلوقتى بيتنفس تحت الماء انه يغرق يغرق يغرق الى الامااام و طبعا هو مش ناسى انه يطلع يقول الجرذان و الى الامام كل شويه و ده طبعا لانه زى ما انتو عارفين سلاحف النينجا ديما بيبقى فى البلاعات و البلاعات بيبقى فيه فران فمن هنا تم اكتشاف سبب ان القذافى فى كل حديث يقول جرذان و ده لان فيه فار نفد من تحت العبايه و بيلعب فى دماغه دلوقتى و ده عشان يبقى عندنا واحد ملعوب فى دماغه و التانى ملعوب فى مناخيره
____________________________________________________________________________________
اعلام :-
طفره فى الاعلام المصرى طوال ايام رمضان بعد للاسف من بث محاكمات مبارك حفاظا على صيام المسلمين و حفاظا على الصحه العام للشعب المصرى فبقت الناس تتابع برامج اخرى و الحقيقه و الغريب ان كل البرامج كانت معارضه بشده لكل الاوضاع و هادفه و كلها معاها مشكله مع المجلس الاعلى للاسانسيرات " المصاعد الكهربيه" و طبعا وزير الكهرباء تتدخل فى الموقف المتأزم ده عشان الاسانسير ميعطلش تانى !!!
و الشىء الطريف ايضا ان كل البرامج بقت تقلس على الحكومه و النظام السابق كانوا يورونا نفسهم قبل 25
و الغريب ان اكبر نسبه مشاهده للمسلسلات كان لمسلسل الفنانه المحترمه الهادفه ........... لسه طالعين من رمضان!!:D
____________________________________________________________________________________
رياضه :-
فى يوم من زوات الايام الزمالك كان شال 6-1 من الاهلى و الحقيقه الزمالكويه من ذلك التاريخ مش قادريين يرفع عنيهم بس الحقيقه بعد اللى ماتشستر يونايتد عمله فى الارسنال و شيله 8-2 فيجب على جمهور الزمالك ان يرفع رأسه عاليا و يحسه ان فريقفهم كبيير و عظيم و فيه امل ياخد الدورى السنه ديه
____________________________________________________________________________________
مسابقه :-
سؤال انهارده مختلف تماما بقى السؤال فييين هو وزير خارجيه مصر !!!! و الغريب انه كان من الداعمين للبرادعى يعنى المفروض راجل بتاع شغل و همه على البلد !!......
اللى يعرف الاجابه يقول
السؤال التانى :-
فييين المجلس العسكرى نفسه و فييين بيان اللى كان المفروض بصدد نزوله فى احداث اسرائيل !!!؟
اللى يعرف اجابه السؤال ده بقى يبعته ل............ مبارك فى المركز الطبى العالمى غرفه رقم 12312 اللى فييها جاكوزى و ساونه و اجهزه رياضيه ..... احمد شفيق قال لازم يكرم و ها هو كلامه يحترم
السؤال الثالث :-
تفتكروا ميين اللى ولع فى العلم اللى على السفاره الاسرائيليه
الشحات
مصطفى كامل
و لا سعد الصغير
ولا هو اصلا كانت تهيقات لو عرفت الاجابه خبى عليها و روح خدلك شقه و عربيه و مش بعيد تبقى وزير
___________________________________________________________________________________
No comments:
Post a Comment