ايه الاخبار 10

جرنال : حسنكو لاى كلام          اليوم : الاربعاء    التاريخ : 12/10/2011     العدد :العاشر       السعر : ببلاش لسه معملوش حد اقصى ولا ادنى للاجور  الجريده لا تنتمى الى اى حزب سياسي او فصيل او جماعه " و الجرنال لا يعبر عن الطبقه العريضه من الشعب ولا الطبقه النايمه ولا اى حد احنا بنعبر عن نفسنا بس  واللى مش عجبو فكل واحد حر فى رأيه "
 _________________________________________________________________________________________________
سياسه :-
يعد مليونيه 8 يوليو خرج علينا رئيس الوزراء القوى الشخصيه اجش الصوت و استجابه لمطالب الشعب و خرج بعده قرارات منها
تعديل الوزاره و اهمها كان تطبيق قانون الغدر على كل من افسد الحياه السياسيه فالحقيقه و بكل صدق بدأت الدراسه و التعديل لكن الحقيقه كان فى مشكله مهمه اوى ان للاسف الدرج اللى فيه القانون الكالون بتاعه قديم من ايام 52 بقى فكان فيه مشكله المفتاح بتاع الدرج مش راضى يفتح و طبعا لان الحكومه بترشد الاستهلاك و بطبق الحد الاقصى للاجور فهى بتحاول تختار ارخص نجار عشان يفتح الدرج و ربنا يستر بعد ما يفتح الدرج ده لو اتفتح منلاقيش الفران كلت القانون او نلاقى الدرج فاضى !!!..... للاسف بعد مظاهرات ماسبيرو و اللى مكنتش حابب اكتب عنها لانها لا تحمل السخريه و لكن المصادر المسؤله اللى نفسى اعرف منهم مصدر واحد قالوا ان فيه قله مندسه حاولت الوقيعه و اثاره الفتنه و طبعا ده يدل على ان مصر بها اقوى جهاز مخابرات و امن قومى و بدليل انهم بيعرفو ما شاء الله ان فيه قله مندسه دخلت فى المظاهرات و الشىء اللى يدعو الى الدهشه ان المواطن البسيط استحاله يعرف ده بس هما مبيعرفوش مين القله اللى بتدخل فى كل حاجه ديه الله يمسيك بخير يا ريس زكريا " فين ايام مصر امانه فى رقبتك يا رافت " ...

و طبعا بعد الاحداث المأسويه ديه كان لازم يخرج علينا رئيس الوزراء اللى زى ما قلت قبل كده القوى الشخصيه ذو الملامح الحاده و قال " اخص عليكو كده صحيتو الفتنه ده انا كنت نايم .. اسف الوزاره كلها نايمه .. اسف قصدى الفتنه كانت نايمه اما بقى بالنسبه لقانون دور العباده الموحد فبرضه نفس المشكله الدرج مفتاح الكالون بتاعه اتسرق فمش لاقين الحقيقه المفتاح و ربنا يوفقهم لما فيه خير لمصر و يلاقو المفتاح ...بالنسبه بقى للناس اللى بطالب عصام شرف بالاستقاله بقى ينفع نطلب من الرجل اللى نزل ما بينا و كل معانا فول و طعميه و اتصور معانا الرجل السكره ده نقوله استقيل الراجل اللى قولنا لازم يرشح نفسه رئيس جمهوريه نقله قدم استقالتك !! اخصص عليكم اخص فيها ايه يعنى وزاره الداخليه بتستهبل و مش عايزه تنزل و فيها ايه يعنى ناس تموت و منتحركش !! و فيها ايه يعنى قله مندسه تندس فى كل مظاهره بتمشى و مبنعرفش هما ميين !! يجى ايه ده جمب راجل بياكل فول و طعميه زينا و احنا اللى اخترناه !! ؟؟ الحقيقه مش لاقى اى سبب مقنع ان عصام شرف الرجل الشخصيه انه يبقى رئيس نادى السكه .......
____________________________________________________________________________
اقتصاد :-

طبعا زى ما انتو عارفين ان مصر تمر باقصى حالات الرخاء الاقتصادى لدرجه اننا مش لاقين 436 مليار جنيه عندنا رخاء اقتصادى يا جماعه ... و لذلك الحكومه نفذت الحد الادنى للاجور و الحد الاقصى مش محتاجه تنفذه عندنا 436 مليار جنيه مش عارفين نعمل بيهم ايه طيرناهم فى الهوا...
__________________________________________________________________________________________
اعلام :-

طبعا التطور المذهل فى الاعلام المصرى بعد الثوره و المصداقيه و عدم فرض الراى ابدا و الحياد التام و طبعا مينفعش ننكر ابدا بقى التطور اللى حصل فى التلفزيون المصرى الحكومى بعد تولى الكاتب اساءه هيكل التلفزيون المصرى بقى مختلف تماما لدرجه انه مبقاش يجيب تامر بتاع غمره و بيجيب كتاب كبار يقولو و يحللو البدله بتاعه المشير !!... و طبعا مش لازم ننسى السبق الحصرى اللى كان فيه تصوير المشير و هو ماشى فى الشارع و كلام المذيع الكبير و الرائع يا جماعه التلفزيون المصرى جامد جدا بس ادوله فرصته و اتفرجوا عليه و بلاش الفرجه على القتوات التانيه اللى بتجيب الحقيقه ديه !! و طبعا مينفعش ننسى الدور القيادى الوطنى اللى قام بيه التلفزيون المصرى و هو بيقود جموع الشعب العظيمه ان تضرب اخواتهم !! ...
____________________________________________________________________________________________
الطقس :- 
الحمدلله فصل الصيف خلص و الجو بدأ يبقى حلو بقى و بالنسبه للبنات دلوقتى مبقاش ليكو حجه بقى خلاص الجو بقى حلو لبس البحر ملوش لازمه دلوقتى
_________________________________________________________________________________________________
 ديكور :-

مطلوب تغيير كراسى اماكن ما اللى قاعدين عليها من اصحاب البدل المهندمه ودائما ما ياخذوا قرارات هامه فى صالح المجتمع و الشعب و الطبقه العريضه من الشعب .. و مطلوب تغيير هذه الكراسى لانها اللى يجلس عليها لا يقوم ابدااا مهما حدث و ده ناتج لان الكراسى مريحه و مرحرحه فقرر مصدر مسؤل انه هيتم عقد مناقصه لطرح كل شركه عن منتجها و ربنا يستر ميكنش مرحرح اكتر !!
_________________________________________________________________________________________________
رياضه:-
فاز منتخب مصر الاوليمبى على منتخب النيجر القوى جدا و المباره كانت تقريبا بدون جمهور و لما الجمهور مجاش اللعيبه اتصدمو و زعلو اوى فانتهى الشوط الاول بالتعادل و بين الشوطين هانى رمزى قال للعيبته العبوا كأنها تقسيمه .. و بالتالى فنزل اللعيبه و كسبوا 3-0 و طبعا لاننا كنا بنلاعب خصم قوى جدا فهو اللى وصل لكاس الامم !! ......... فى مباراه الموسم بين الزمالك و انبى فى نهائى كاس مصر و هستعير كلمات قالها الكابتن جمال عبد الحميد المحلل المبهر " اتحاد الكره كان بيضغط على فريق الزمالك هو كمان لانه قرر الاحتفال بالكاس فوق وسط الجماهير ... ده على اساس ان كان فيه حد فى مصرعنده شك فى مثلا ان الزمالك المفروض ياخد الكاس و على اساس ان لاعيبه الزمالك كلهم تحت 17 سنه .. و اضاف ايضا فى تصريح مهم جدا ان الزمالك اتعلم الدرس و اتعلم ان الكوره مدوره و يجب على الجميع الاستفاده من هذا الدرس القوى ان الكوره سبحان الله مدوره" ......
_______________________________________________________________________________________________
سؤال الحلقه :-

مفيش سؤال و مفيش جوايز حداد !!! ...........
__________________________________________________________________________________________
بكده خلص عدد انهارده يا رب يكون عجبكو و ميكنش دمه تقيل