ايه الاخبار 14

ايه الاخبار 14

جررنال : حسنكو لاى كلام       العدد : الرابع عشر      اليوم : الاربعاء      التاريخ      15/2/2012          السعر : ببلاش الشعب مش لاقى غاز ولا بنزين    

____________________________________________________________________________
سياسه:-

صرح مصدر مسؤول ان هناك مخطط لحرق البلد و ان هناك اصابع خفيه كما ذكرنا فى العدد السابق و لكن فى تصرييح خطيير جدا قال انهم يتحدثون بشفرات و بلغات غريبه على الفيس بوك و طبعا هما اكييد يقصدو الفرانكو و نظرا لدورنا الوطنى فى دعم الاستقرار و حمايه مصر من العبث بها فسوف نقوم بمساعده من يقرأ هذه الشفرات الى فهم ما هو مكتوب مثلا لو حب يكتب حرف ال (ح يبقى هيكتب 7 ) (اما ال ء فهتبقى 2 ) اما حرف ال ( خ هيبقى 5 او احيانا 7و فوقها شرطه و طبعا ده على حسب نوع المندس  المندسين مدارس برضه يعنى و حرف ( ال ش فيه ناس بتكتبو 4 ) و حرف ال (ع بيبقى 3 ) و حرف ال (غ هيبقى 3 و فوقها شرطه برضه او 8 ) و زى ما قولنا فى مدارس مندسين خاصه و حكومه و هذا كان لزاما علينا ان نساعد من يدير شؤون البلاد و الله الموفق و المستعان ......
مازالت محاكمه مبارك و اولاده و شيلته مستمره و مازال المحاميين يظهروا الى الشعب كم البراءه و الوداعه التى كان فيها المتهمين لدرجه انى كنت حاسس انى بتفرج على مسلسل تركى من كم الرقه اللى كانوا فيها ...... و طبعا لو انتظرنا نتيجه المحاكمه فسوف يشاهدها اولاد احفاد مبارك ربنا يديكو الصحه و لكن فى انتظار ان ينقل لنا شاشات التلفزيون صوره من امام سجن طره و ان هناك جموع من الشعب واقفه و تخرج مبارك من سجنه و على الصفين مدرعات الجيش واقفه و هذه الجموع تهتف الجيش و الشعب ايد واحده و كفاره يا ريس و اخترنااه اخترناااه و يترشح لرياسه الجمهوريه و ينجح و احنا لسه فاتحين التلفزيون  و اعدين على نفس الكنبه و نحاول نقلب لحد ما نلاقى صوره لميدان التحرير بس فاضى ... لان قاطنى ميدان التحرير يا اما ماتو يا اتسجنو ........
بدأ مجلس الشعب جلساته و من او جلسه يتضح مدى التوافق بين جمبببع طوائف  اعضاء البرلمان و طبعا جميع من فيه متفهم جدا مدى الديمقراطيه و حريه ابداء الرأى و لا يقاطعوا احد ابدا حتى لو كان بيقول فيه لمؤاخذه خرطوش ولا حاجه و طبعا من اهم الادوار اللى لازم يقوم بيها مجلس الشعب هو تشكيل لجان و لجان تقصى الحقائق لانهم زى ما انتو عارفين لهم سلطه تشريعيه و من اهم اختصاصات مجلس الشعب ان يشرع قوانين بس الحقيقه هما مش فاضيين يطلعو و يعملوا قوانين عشان العصر اذن ولازم نقوم نصلى .. و الله اكبر ...... اوعى حد يفتكر فيلم فريد شوقى انا لمتلك السبحه يا شيخ  لان مفيش وجه مقارنه ..............
ولازم مننساش الروح الجميله اللى فى المجلس لما عضو صوته يروح رئيس المجلس يديلو هولز عشان صوته رقه و حنيه ولما عضو يلاقى خرطوش يجى يوريه لزمايله فى المجلس و المجلس يهلل من الفرحه و يروحو عشان يتصورو جمب الخرطوش !!
____________________________________________________________________________
اعلام :-
اصبحت قناه سى بى سى من اكبر و افضل القنوات لان اغلب مذيعها كانو من مذيعى التلفزيون المصرى "كله حصرى على التلفزيون المصرى " بقى يجيبو اخبار قبل ما تحصل و هى دى الطفره اللى كنا مستنينها لان بعد الثوره التلفزيون المصرى بقى بيولعها بس لكن مبقاش يجيب اخبار حصربيه و لكن اخيرا وجدنا قناه سى بى سى و انها تفوقت على شعارات قناه اون تى فى انت من يصنع الحدث و العربيه ان تعرف اكثر و بقى شعارها نحن نسبق الحدث 
____________________________________________________________________________
سياحه :-
نتيجه لازدهار السياحه فى مصر بعد الثوره و لان كل الفنادق كومبليت ولان مصر اعادت هيكله الداخليه فاصبحت مصر كما كانت بلد الامن و الامان بنلاقى ان فى سياح بيتخطفو و طبعا لان الامن عندنا كويس و امور و لطيف فبيخرج متهمين من السجون و بيفرج عن عصابات فى سبيل السياح الاجانب اما طبعا لو اللى مخطوف مواطن مصرى شريف فيخلى شريف ينفعه ...
____________________________________________________________________________
اقتصاد:-
صرف 3 مليون جنيه على مستشفى طره لاستقبال سياده معالى رئيس الجمهوريه " المخلوع سابقا " و ده يدل على الرخاء الاقتصادى اللى مصر فيه و نجاح الجنزورى فى انتعاش الاقتصاد المصرى لدرجه اننا عالجنا المصابين و صرفنا تعويضات الشهداء و وفرنا للمصابين افضل المستشفيات و احضرنا لهم جميع التجهيزات اللازمه تكريما لدورهم .. و طبعا ل اللى بيبص لنص الكوبايه الفاضى احب اقوله بص على النص المليان يااللى كنت بتقول مش عايز الجنزورى و جدو و الكلام ده شوفت اهو الراجل رجع المليون تانى مش اللى قبله كانو بيتكلمو على مليار مش نحمد ربنا بقى شعب طمااع اوى صحيح ........ الا هو خد عنده فكره اخبار الحد الاقصى للاجور ايه صحيح ؟ " الله يجازيك يا شيطان"

____________________________________________________________________________
رياضه :-
مفيش رياضه فى مصر مفيش رياضه يموت فيها 75 واحد ............... حداد على اللى ماتو

!!!!!!!!!!!............................................................................................................................................................................................................................................................................................................................................................................................................................................................................................................................................................................................................................
____________________________________________________________________________
سؤال العدد :-
تفتكر ميين هو الاصابع الداخليه ؟؟؟؟
ال 19 صباع ؟؟؟!!
ولا ال 19 صباع اللى فى طره
ولا المعد بتاع قناه سى بى سى !!؟

اللى يعرف الاجابه يبعتها فى اس ام اس للمجلس الاعلى للقوات المسلحه . عشان يعيدو الامن و الاستقرار فى جميع ارجاء المحروسه 

_______________________________________________________________________________________________
بكده خلص عدد انهارده و يا ريت يعجبكم و اسف لو كان دمى تقيل بس اللى بيحصل ميخليش الواحد يكتب براحته