ايه الاخبار 11

ايه الاخبار 11
جرنال : حسنكو لاى كلام            العدد : الحادى عشر              التاريخ 11/11/2011    اليوم الجمعه      السعر : دائما و ابدا ببلاش لا الناس بتقرا ولا معاها فلوس تشترى عشان تقرا  ولا الحكومه نفذت وعودها و اديتهم فلوس عشان يعيشو ..

الجريده لا تنتمى لاى حزب او جماعه او "فصيل" و بنعلن عن اننا مش هنسمح بالاعلان لاى حزب لان من الاخر هدفنا مش الربح
_____________________________________________________________________________________________________
سياسه:-
وبدأ اخر الاستعداد للانتخابات البرلمانيه القادمه و كل حزب بدأ يعرض افكاره و توجهاته و طبعا ده مع الوعود السابقه اللى اخذها على نفسه المجلس العسكرى بان

الانتخابات هتقوم فى موعدها "محصلش " و المصريين الى فى الخارج لهم الحق فى التصويت "محصلش الا بعد قرار المحكمه " و طبعا بعد عزل جميع الفلول " محصلش برضه غير بعد قرار من القضاء الادارى يوم الجمعه "اجازه" و طبعا مش لازم ننسى اهم وعد ان الانتخابات مؤمنه تماما تماما " ربنا يستر على دي كمان " ... بعض الناس مستعجبين اوى من التطويل و الفرد بتاع المده بتاعه وجود المجلس العسكرى و فيه ناس اعوذبالله بيظنو ظن سىء اوى فى المجلس اللى مضربش نار على الثوار "حبسهم بس " و يقولو دول طمعانين فى السلطه استغفر الله لازم نكون حسن النيه معاهم يا جماعه اديكو شايفين حال البلد عامل ازاى و يا عينى الحكومه المدنيه اللى احنا اخترناها و المجلس يا ولداه جابهلنا و بيساعدها بكل ما اوتى من قوه و مبيحطلهاش عقبات ولا اى حاجه عشان يكرهنا فى عشتنا من الحكومه المدنيه و نفكر بقى فى حكومه عسكريه كده يكون مثلا واحد مسك جهاز المخابرات ولا حاجه ولا يكون مسك وزير طيران مثلا يعنى و المده الطويله دى بس عشان احنا شعب كميه الرصاص اللى موجوده فى الجو ممكن تنسيه و تقول هم دول الاصلح " انسى" .....

اما بقى بالنسبه للدعايا الانتخابيه للمرشحين و الاحزاب فاحب اقلهم اتقوا الله فى مصر و بطلو حركات اللى اتحل لانحلكو انتو كمان و ده طبعا برضه ميفوتناش كجريده ساخره اننا نلقى بعض الضوء على اغلبيه القوائم الهزليه اللى كان لازم يكون فى كل قائمه سيده فبالطبع كانت اغلب القوائم متزيلها سيده او ورده بالنسبه للورده قصدى السيده فى كل الاحزاب من الواضح انهم لسه مقتنعين ان الست المصريه مكانها البيت يا بهيه ...
______________________________________________________________________________________________________
محليات :-
بما اننا داخلين على فصل الشتاء و المفروض بقى ان المحافظين اللى بعد الثوره يكونو اهتمو بقى بان يعنى بمشيئه الله الدنيا هتمطر فطبعا كان كل الاهتمام منصب على انهم يعملو بلاعات عشان الشوارع ميبقاش فيها برك مياه و ميحصلش ازمات مروريه و طبعا لازم نشكر الساده المسؤلين فى المحليات على انهم بتجميل المدن و جعل الزباله معلم اساسى من معالم كل محافظه يعنى مثلا تدخل القاهره تلاقى كده الزباله اكوام اكوام و ده طبعا بيعبر عن ان القاهره متكدسه بالسكان و لهذا فالشكر واجب لكل من يعمل بالمحليات
____________________________________________________________________________________________________
كوارث طبيعيه :-
بعد زلزال تركيا خرج علينا اردوغان و قال ان الحكومه فشلت فى مواجهه هذه الكارثه الطبيعيه و انه بيعتذر عن هذا التقصير بيفكرنى طبعا بموقف مشابه فى دوله ما بعد ثوره مجيده مدرعات دهست ناس طلع علينا المسؤل ربنا يكرمه و قال هناك قله مندسه يحاولون الوقيعه بين طوائف الشعب يااااااااه اد ايه فى شبه فظيع الكوارث الطبيعيه مش لازم تكون زلازل و براكين و فيضانات ممكن تكون اشخاص
___________________________________________________________________________________________________
اعلانات :-
صابون صبنكو المدهششش ممكن يزحلق عشان يسرع من تسليم السلطه وممكن يستخدم ايضا لتنظيف جميع المصالح الحكوميه من الفساد اللى فيها و ممكن ايضا يستخدم ايضا  2×1 ايوه انت سمعت صح 2×1 يسرع المحاكمات و ينضف القضاء من جوه و مش هتصدق عزيزى العميل ممكن كمان يطهر الداخليه مش مصدق .... اعمل انتخابات من غير تزوير و من غير تزييف و انت تشوف
__________________________________________________________________________________________________
رياضه :-
دائما و ابدا و زى ما هو معود جمهوره على طول الزمالك يخسر فى العيد و الجميع بيحاول يبحث عم الاسباب وراء خساره الزمالك فى مثل هذا التوقيت بالذات فالاكتشاف كان مذهل جدا و هو ان جمهور الزمالك بالاساس بيشجع الزمالك مش عشان الزمالك بياخد بطولات لا عشان هو فريق بيعانى و كل ما الزمالك بيعانى اكتر كل ما تلاقى الزملكاويه بيحبوه اكتر فعشان كده الزمالك بيخسر كل عيد و بالنسبه بقى للمئويه بتاعه الزمالك فالحقيقه اختارو برضه المعاد المناسب بعد العيد عشان لما يخسرو جمهور الزمالك عشقا لهذا الفريق اما بالنسبه لقله الادب يتاعه ريس فى ماتش امبارح و هو بيلم فى شارع اطمئنيت على مستقبل الزمالك
___________________________________________________________________________________________________
اخدنا ايه من الثوره :-
اخدنا ايه يعنى من الثوره مشينا مبارك و طلعلنا فى التلفزيونات يقرفنا و هو بيلعب فى مناخيره ولابس ترنك
اخدنا ايه يعنى الزباله هى هى فى الشارع
اخدنا ايه يعنى من الثوره الشرطه مبقناش نشوف خلقتها
اخدنا ايه يعنى من الثوره الزمالك برضه مخدش الدورى
اخدنا ايه يعنى من الثوره الزمالك برضه بيخسر فى العيد
__________________________________________________________________________________________________
مسابقه :-

تفتكر المجلس العسكرى مط المده ليييه ؟؟؟
1- حسن نيه والله و زى ما ديما بيقولو المجلس ملتزم بتسليم السلطه لسلطه مدنيه منتخبه " بس يا خوفى السلطه تبقى سلطه " و الاتنين نفس طريقه الكتابه

2- زى ما قولنا فوق مستنى الناس تنسى و بعد كده استغفر الله ان بعض الظن اثم يجيبو شفشق ولا سلمونتى ؟؟؟
3- مستنى الزمالك ياخد الدورى " يبقى مفيش تسليم سلطه "
اللى يعرف الاجابه يبعتها  على بريدنا الالكتروى حسنكو لاى كلام دوت نص كوم