ايه الاخبار 17

جرنال حسنكو لاى كلام اليوم : الجمعه  التاريخ :   21/12/2012  نهايه العالم زى ما وكاله ناسا قالت و رجعت فى كلامها و محدش يربط بين ان مرسى كان شغال فى ناسا و اللى حصل ده                       العدد : السابع عشر 

 ____________________________________________________________________________

عندنا بس و مش عند اى حد تانى كل الاخبار الساخنه و كل الفضائح و كل الخطوط الحمرا هنتخطاها و سيبك من طونى و الابراشى عندنا الحرايق كلها بشكل حصرى !!... الحقيقه مش قادر افهم ليه يبقى فيه حاجه اسمها اخبار ساخنه و وضع ملتهب و برامج اشك ان اغلبيه اللى بيجو فيها بيكونو كومبارسات و مش فاهم ايه هى القضايا الساخنه اللى تيجى فى الرياضه عشان شوشو سلطات و لا مدحت كلاوى و لا شبانه يعملو عليها كل البروباجاندا دى !!... ليه ميكنش خبر عادى مهم ليه الحق الكارثه عربيه عدى من قدامها حمار و الحمار سليم الحمد لله !.!.. لو بدور ع الكلام ده فمش هتلاقيه عندنا ... ____________________________________________________________________________

سياسه :-

تشهد مصر هذه الايام اكبر و اعظم عرس " بضم ال ع " و اللى عايز يقراها بتشكيل تانى هو حر احنا فى عصر الحريات و مفيش حد بيحاصر ولا بيحرق فى صحف ولا مدينه انتاج نرجع بقى للعرس الديمقراطى اللى بتشهده مصر  على الاستفتاء ع الدستور اللى تم التوافق عليه بنسبه 90 % من الشعب و الناس بتاخد بعضها بالحضن و ذلك بعد ان دعى السيد الرئيس محمد خيرت بديع الاخوان الى الاستفتاء ع الدستور و ان يقول الشعب كلمته و طبعا رئيس كل المصريين حاول يحمى الدستور اللى مشفتوش مصر طول حياتها ولا هتشوفه ان شاء الله و اصدر اعلان دستورى عشان يحمى الاستفتاء ده من مؤامره خبيثه كانت بتحاول تعملها اسرائيل و امريكا و بعض من المخربين من الداخل اللى كانو اعدين فى حاره مزنوقه كانو محصورين و بيفكو .. شفاكم الله و عفاكم و طبعا لان النظام القديم لسه موجود فى السجون طبعا فهو بيخطط لقلب نظام الحكم وخطف الرئيس فى شوال و يودوه الامارات .. فأصدر الرئيس الاعلان الدستورى الاول و اللى شال فيه النائب العام و حصن التأسيسيه و حصن مجلس الشورى و عين نائب عام جديد شريييف . و من كتر م الناس سعيده بقرارات الرئيس نزلت تهتف ادام القصر و كانت عايزه الرئيس ينزل عشان يخدوه بالحضن بس للاسف فيه قله قليله منهم اتهجمت على عربيه الرئيس و عورت السائق و اصابته خطيره و يتم علاجه على سرير سياده الرئيس لان الرئيس كان بيحلم لان الكلام ده كله من وحى و تأليف مكتب الارشاد والبث الحصرى لقناه مصر 25 و الجزيره و شكر خاص لوزاره داخليه الاخوان. و على المتضرر اللجوء للقضاء اللى مش هيلاقيه او هيلاقيه متحاصر او لو لقى حد فهيتحبس لان النائب العام بياخد على خاطره لما الريس محمد خيرت بديع الاخوان يزعل

ايه الاخبار 16

جرنال حسنكو لاى كلام       العدد :  السادس عشر   اليوم : السبت    التاريخ: 19/5/2012        السعر : ببلاش الشعب مش لاقى اى حاجه بس جاله الضغط و السكر من اللى بيشوفو و برضه مش لاقى ادويتهم ... الجريده لا تنتمى لاى فصيل سياسى ولا اى تيار هتسألونى ايه لزمه الكلام ده هقولكم كلهم بيقولو كده وفى الاخر هيوجهوك لاللى هما عايزينه
____________________________________________________________________________________
سياسه :-
يستعد الشعب المصرى لاجراء اول انتخابات رئاسيه الرئيس فيها ميعرفش هيشتغل ايه ولا هيبقى ايه وظيفته بس برضه احنا لازم نستعد يعنى نصرف كده اد 10 20 مليون للمرشح و الشعب مش لاقى ياكل عيش معفن من الزباله حتى بس اهم شىء برضه نعمل الانتخابات و فى عز ما الناس بتستعد للانتخابات و مجلس الشعب منشغل بحل المشاكل المتعلقه بالختان و حجب المواقع الاباحيه و تقليل سن الزواج للبنات و طبعا كلها قضايا مهمه جدا لما فيها من مشاكل للشعب الغلبان اللى مش لاقى ياكل ولا حتى يشرب و لا لمؤاخذه ......  فى الوقت ده بقى المجلس العسكرى بيعد دستور مكمل عشان الرئيس لما يجى يبقى عارف شغلته ايه و الله الموفق و المستعان_________ الحقيقه فى ناس كتيره جدا مصره بشد ال ص اننا نتكلم عن موضوع ابو اسماعيل بس الحقيقه مكنتش حابب اتكلم فيه بس بعد ظهوره مع الزميل بسرى فوده و كان ماشاء الله بصحه جيده و وشه منور و مدور و له نفس يهزر و يضحك و الحقيقه يا جماعه احنا لن نشكك ابدا فى كلام المحامى حازم و لكن الحقيقه الشعب نفسه يعرف ايه هى الاخبار الساره اللى بقالها شهرين مجتش دى و يا خوفى نستنى كتيييير اوى او ننسى كعادتنا و لكن الحقيقه يا جماعه انا ايقنت ان امه مصريه 100% لان ديما الامهات المصريه بتصف ولادها بصفات فيهم "ادام الناس بس" فهى سمته حازم و هو فعلا حازم فى مواقفه يعنى انصاره ينزل و ين .... لا اسف منزلش معاهم  .. و يتقتلوا و هو يدا ..... اسف قال انهم مش مؤيديه .. و يقول هننزل لاجتماع يوم الجمعه لاتخاذ قرارت مصيريه و ي.... اسف ده قال ان فيه اخبار ساره الحقيقه انا بدأت اقفش اوى من اسم ساره اللى بيطلعلنا فى كل حته ده عموما مع حازم سنحيا مغفلون و ميتون و هم على جثثنا يرقصون و يتلمعون ____________ بعد ازمه المواطن المصرى احمد الجيزاوى و لان مصر حصل فيها شىء ما يسمى ثوره فكان لازم يكون فيه مواقف حازمه من السلطات المصريه كالعاده و بالتأكيد من مجلس شعب الشىء ده اللى بيسموه الناس ثوره فكان رد فعل المجلس العسكرى حازم فى حمايه المواطن                        السعودى فى مصر و حمايه ايضا السفير و حدث ولا حرج عن مجلس الشعب فتم تشكيل لجنه من 120 منهم اعضاء مجلس شعب و ممثلين و مثقفين بيفكرونا طبعا بماتش الجزاير اللى كان فى السودان و الحقيقه يا جماعه راحو و ملو كرشهم الحمدلله و طبعا بعد الاكل تقلو و نامو ........ لو بتفكر تسألنى عن الجيزاوى احب اقولك معلش الاكل كان طعمه حلو اوى طال عمرك ..! _____ لان فى مصر مجلس شعب حمش و قوى و لانه قادر على سحب الثقه من الحكومه فبالفعل كان مجلس الشعب الذى يملك جميع الصلاحيات بان يغير الوزاره الاقوى فى مصر و يجيب وزاره اخرى برئاسه نفس رئيس الوزاره اللى فاتت و بنفس الوزرا مع انه جابت وزير للثقافه جديد و ده لان فى عهد الوزير السابق شهد تدنى حااااااااد للثقافه لدى الشعب المصرى و قلت نسبه القراءه الى .01% واحد فى الميه من الميه مما يعنى تقصير فادح فى اداء مهام الوزاره حمى الله مصر و يجعله عامر اساحبى
____________________________________________________________________________________
اعلانات :-
من واقع دورنا فى توعيه الناس عن المرشحين فقررنا اننا ندعم المرشحين من خلال اعلانات ليهم ببلاش و ذلك دعما لهم
المرشح الفريق احمد شفيق .. رمز الطياره
 !  O .............................................. ايه :
برنامج السيد شفيق يتلخص فى مطار و طياره مطار لكل مواطن ناوى يفضل فى البلد بعد ما ينجح و طياره للى يحب يسافر بره و طبعا الفريق مش بتاع عبارات بتغرق ..
السيد عمرو موسى ... رمز السيجار و احيانا اللغد على حسب الظروف
هىىى انت مش هتنتخبنى ليييه عشان فلووول هىىىى انت انا مش فلول و اثبت ان انا مش انا هيييى انت اد التحدى ؟
و طبعا  برنامجه الانتخابى يتلخص فى عمل دماغ للشعب و الشعب كله هيعيش فى فلل و قصور و جناين زى بتاعه بلاد بره بالظبط و ازاى مترشحوش البرنسسسس
الاستاذ حمدين صباحى رمز سيجنال تو
واحد مننا
برنامجه يتلخص فى نشر البهجه و السرور على الشعب المصرى و هيختار مسؤلين بشوشين كده و بيضحكو و المواطن اللى هيضحك هيديله علاوه
الدكتور عبدالمنعم ابو الفتوح رمز الكف
مصر القويه المستقويه
برنامجه يتلخص فى انه هيعمل مسابقه بعد ما يكسب عن من هو عبد المنعم ابو الفتوح ليبرالى ولا سلفى ولا اخوانى ولا وسطى و لا واحد تانى و اللى هيعرف الاجابه هيعينه نائب
الاستاذ خالد على رمز الفرشه
لو كسب يبقى احنا اكيييد بنحلم
الدكتور محمد سليم العوا     رمز المعجم
برنامجه يتلخص فى اخراج جيل يتحدث اللغه العربيه بطلاقه
الدكتور محمد مرسى .... رمز الكوريك
من اجل رفع المصريين
و يتلخص برنامجه فى انه يدخل المصريين فى الاسلام
و نكتفى بهذا القدر من المرشحين لان الباقى كأنهم مش موجودين
____________________________________________________________________________________
الطقس :-
الجو بدا يبقى حر و بالنسبه لو هتركب مواصلات خلى معاك مشبك او معطر او خد ثواب و هات ريكسونا و كأنك بتذكى عن مالك اما بالنسبه لو بتمشى فى الشوارع فانصحك متمشيش لانك هتلاقى بنات لابسين و نازلين البحر اما لو انت ....... فانزل و هتنبسط اوى اوى يعنى
____________________________________________________________________________________
قضايا و اراء :-
بعد حوالى 10 ايام من انهارده المفروض هيكون النطق بحكم لامؤاخذه مبارك و طبعا لاننا مبندخلش فى احكام القضاء المصرى النزيه فلو الاعاده بين مرسى و ابو الفتوح مبارك هياخد براءه و لو الاعاده بين موسى او شفيق و اى حد ضدهم ممكن ياخد حكم و الحدق يفهم المغزى بقى ....._____
حسين سالم هيترحل على مصر  مش عارف تاريخ كام 2011 حسين سالم هيتسلم لمصر مش عارف تاريخ كام بعد اللى فات 2011 حسين سالم اتقبض عليه و معاه فلوس اد كده برضه تاريخ بعد التواريخ اللى قبل 2011 حسين سالم بقرار من المحكمه هيستلم لمصر خلاص 2012   من كام اسبوع حسين سالم مع عمرو اديب انا رجل شريف .... الشتيمه حرام و احنا فى ايام مفترجه
____________________________________________________________________________________
محليات :-
طبعا ازمات البنزين و البوتجاز مازالت مستمره الى الان و لكن الازمه لسه موصلتش لدوله الاخوان اللى بيستخدموا الانابيب و السولار فى الدعايا بتاعتهم الله اكبر ولله الحمد و دى طبعا من المعجزات اللى تخلينا لازم نتقى الله و نرشح الاخوان
____________________________________________________________________________________

 سؤال العدد :-
ماذا تعرف عن تاسيسيه الدستور ؟؟!!
1- مستنين يشوفو ميين الرئيس الجديد
2- اسأل المشير
3- اسال المرشد
اللى يعرف الاجابه يخليها لنفسه
بكده خلص عدد انهارده و يا رب يكون دمنا خفييف عليكم يا رب ان شاء الله  

ايه الاخبار 15

ايه الاخبار 15

جرنال : حسنكو لاى كلام      العدد الخامس عشر   التاريخ   :  15/4/2012   اليوم : الاحد      السعر ببلاش لسه العسكر ماسك و كاتم على الشعب مايه و نور و غاز وسولار بس الحمد لله لسه سايبلنا الهوا فيه شويه غاز بس نحمد ربنا
____________________________________________________________________________________
سياسه :-
سباق انتخابات الرئاسه اصبح على اشده و مازال كل مرشح حتى اللى طلعوا بيقولو احلامهم و امانيهم و برنامج اطلب و اتمنى و انهم هيخلوا مصر جنه و طبعا كل ده ببرامج واضحه و مدروسه و طبعا تنفيذها هيكون سهل و بسيط زى المرشح اللى هيحل ازمه ركن العربيات و دى طبعا ازمه صعبه جدا بيواجهها كل المصريين لان كل مواطن مصرى معاه عربيه و فى اللى اوباما مرعووب منه انه يكسب و عامله الف حساب و بيحاربه و عايز يخرجه من الانتخابات باى شكل و فى  اللى معاه مشروع النهضه بس للاسف خرج و نزل مكانه زميله اللى هيكمل مكانه مشروع النهضه اللى هو ايه بقى مشروع النهضه  اسأل المرشد .... اما بالنسبه للجنه وضع الدستور فلقد التزمت الجماعه كما عودتنا دائما بانها لن تستحوذ على لجنه وضع الدستور و ان الدستور سيكون توافقيا و يجمع كل طوائف الشعب و تأكيدا على صدق كلامهم كان نسبه الاعضاء فى اللجنه 47 % بس !! و كعاده كل القوى ترمى الجماعه بالباطل و تتهمها ابشع الاتهامات بانها استغفر الله خانت الثوره و انها بتاعه مصلحتها ازاى نقول على اللى حامل فى الخير لمصر كده يا جماعه و كمان تعالو نراجع مواقفهم جميعا و هنأكد انهم اوفياء .... تصريح فى ابريل 2011 حزب الحريه و العداله سيترشح على 40 % من مقاعد مجلس الشعب ..... يونيه 2011 الحامل هتترشح على 70 % عشان يحصلو على 40% شفتو اد ايه احنا ظنينا بهم سوء !! ..... الحريه و العداله تترشح على 100% من مقاعد مجلس الشعب  ...!!! عادى يا جماعه برضه اوعى تظنوا بيهم سوء هما بس خافو من الفلول ....طب تعالو نشوف موقف تانى ... النائب اكرم الشاعر يبكى الجميع و يطالب بالقصاص العادل ايوه بقى الاخوان فل اهم ... احداث مجلس الوزراء نواب الشعب هما ايه وداهم هناك !!  و ده مخطط برضه بلاش سوء ظن المواقف كتيير و اكيد هتأكد حسن نواياهم الاخوان لن يترشحو على منصب رئيس الجمهوريه ...... ترشيح الشاطر لرئاسه الجمهوريه و مرسى على دكه البدلاء !. ... برضه الاخوان مبعوش الثوره و لازم مننساش العضو محمد البلتاجى " نادر بكار " حزب الحريه و العداله على تصريحاته عكس التيار دائما و ده يدل على ان داخل الجماعه الراى و الراى الاولانى .........
بالنسبه لقضيه الشيخ حازم و من يؤيده من لازم حازم و حازئون فهكتفى بتصريح للشيخ حازم " ناقص يقولو ان اختى فرنسيه " و عند سؤال الشيخ عن جنسيه اخته قال امريكيه ان شاء الله و يجعله عامر ....
اجتماعات مكثفه فى الجامعه العربيه لحل ازمه الوضع فى سوريا و لكن الحقيقه اللى دخلو  اجتمعو لحد دلوقتى مطلعوش و البعض بيقول ده نتيجه الانفلات الامنى اللى فى مصر و البعض الاخر بيقول انهم محصورين ربنا يفك زنقتهم و الراى الارجح انهم مشيو و نسيو القضيه و مازال البحث جارى عن دكر  ... اما بقى بالنسبه للمجتمع الدولى فحدث ولا حرج .................................................................... معملوش حاجه اذا كان احنا معملناش هما هيعملوا اما بقى بالنسبه للقمه العربيه اللى كانت فى بغداد فهى كانت لتهنئه رئيس العراق على القاعه الجديده المكيفه ...... مبروووك يا ابو نسب
____________________________________________________________________________________
حوادث :-
فى الوقت اللى بنكتب فيه العدد بتاعنا فى حرييق هائل فى السويس فى مصنع للمنتجات البتروليه طبعا واحد هيقول و المسؤولين قالوا ايه احب اطمنه و اقوله احنا فى مصر يا بابا المسؤول نايم دلوقتى الفجر  و مينفعش نصحيه نخضه بعد ما الدنيا كلها تتحرق نبقى نكلمه نقول له ان شاء الله اما بقى بالنسبه لمجهودات اجهزه الاطفاء فالحمدلله مصر فيها احدث اجهزه الاطفاء فى العالم بس المشكله الوحيده اللى مخليه الحريق مش عايز ينطفى ان فى واد رخم كل ما يطفو النار ينفخ فيها و طبعا لان مصر بلد الحريات فهما سايبين الواد يلعب "العب يا باشا "
____________________________________________________________________________________
فن و مسرح :-
طبعا قلت اكتب حاجه عن الفن قبل ما يلغوه ان شاء الله فحاليا يا جماعه و بجميع دور العرض و ببلاش فيلم الموسم فيلم اخواسلسكر  و هو فيلم خيال علمى يتحدث عن ثوره قامت فى احدى الدول و العسكرى مسك فيها الحكم حتى يعبر الفتره الانتقاليه و اتفق مع جماعه و جماعه اخرى ليهم شكل مميز و بيلبسو لبس مميز و الناس بتصدق كلامهم و كان الاتفاق على ان يتم تسليم السلطه و محدش يدعبس ورانا بس الجماعه حبت تطمع شويه فراح العسكرى هددها و فضح امرها راحت هى نزله الشارع عشان تكمل الفيلم و انهم افشين من بعض و مخبيه انها طمعانه فى السلطه و عايزه تضرب العسكرى عشان ميتبقاش غيرهم ..... بس للاسف الفيلم اتمنع من العرض قبل عرضه بيوم و نظرا لان فيه مشاهد مخله بالاداب العامه و طبعا ميصحش نشوف الحاجات اللى بتحصل ورا الستار ..!!!
___________________________________________________________________________________
اقتصاد :-
تشهد مصر حاله من الرخاء الاقتصادى و الانتاج الوفير فى جميع المنتجات و السياحه نسبتها زادت لاعلى المعدلات و كل هذا نظرا لعدم حدوث اى مليونيات و من كتر ما الناس بقت لاقيه كل المنجات بقت بتنزل تفتكر ايام زمااان و تقف ادام مستودعات الانابيب طوابيير بالانبوبه عشان تفتكر العز اللى بقينا فيه و برضه اصحاب العربيات بيقفوا ادام محطات البنزين بالجراكن بيحتفلو بان كل شىء بقى متوفر و لدرجه انهم بيفكروا يعملو عيد قومى لاننا لاقيين كل حاجه و يسموه طنطاوى ...!
___________________________________________________________________________________
ركن الاطفال :-
يحكى ان فى عصر من العصور و فى زمن من الازمان كان فى جماعه اسمها اخوان معاها سلطه و لما الناس طالبوها بحقوقهم قالت عليهم دول حبه عيال خونه و عايزين السلطه و لما نزلوا الشوارع يطالبوا بحقوقهم قالوا هما و الجلاد دول خاينين للبلاد و اللى يتقبض عليهم منهم يتحبس و يكون عبره للعباد و مش بعيد نعمل قانون يكون ضد المظلوم عشان ليه يطالب بحقه و هما فى السلطه غالبين و عمليات تجميل شغالين .. بس خير اللهم اجعله خيير فى يوم من الايام الطمع زاد كمان و خانوا الجلاد و نزلوا بمرشحين للرئاسه كمان قام الجلاد جايبلهم زليمان عشان يفكرهم باللى كان بينهم زمان قاموا ساءوا فيها و عملوا فيها بهلوان و ع الميدان نزلوا كمان مش ده اللى كنت عايزين تعملوا قانون يحرم نزول الميدان و قولتو ع البنات دول لمؤاخذه مش تمام و ايه نزلهم الميدان وقال ايه لابسه عبايه و اي الغرض منهاو الحكايه بالذمه ده كلام يا اخوان ايش نزلكم يا اخوان و معاكم ستاتكم كمان مدام المكان زى ما قلتو زمان فيه لامؤخذه كلام !!... و الحكايه هتفضل مستمره طوول ما المنافق عامل فيها شيخ و اللى يقول الحق يبقى ملعون و خاين و القصه دى مش للاطفال لان حتى الاطفال المسرحيه بقت مفضوحه ادامهم من زمان ........
___________________________________________________________________________________
رياضه :-

طبعا مفيش رياضه فى مصر و طبعا لان مصر بلد غنيه فمصر بتصرف على الرياضه ملاييين الجنيهات على التدريبات بس و ده لان مصر فلوسها كتتيير و مش عارفين بنوديها فييين فبنصرفها على النوادى و لعيبه الكره
____________________________________________________________________________________
سؤال العدد : -
ما هى جنسيه السيده ام الشيخ حازم ابو اسماعيل ؟؟؟
1- مصريه طبعا
2- مصريه بس يعنى ميمنعش جنسيه امريكيه كده لزوم الدخول و الخروج
3- امريكيه و الشيخ حازم عارف بس مدكن
4- مصريه بس اوباما افش على ابو اسماعيل خايف منه ؟؟؟
اللى يعرف الاجابه يبعتها للشيخ حازم ابو اسماعيل "توفيق عكاشه " و هو هيرد عليه و يدعيله و لو من ذوى الاحتياجات الخاصه ربنا ان شاء الله يجعل الشفا على ايد الشيخ حازم

سميها زى ما تحب

• الضحك انواع فى الضحكه الصفره اللى بتضحكها لحد مش طايقه او بتعدى موقف و خلاص و فى الضحكه الحزينه اللى بتكون فى لحظه فراق و فى الضحك اللى بصوت عالى اللى بيكون مع اصحابك اللى بتبقى هتموت من كتر الضحك بس احلى ضحكه لما تكون نفسك تقول حاجه لحد و عنيك فضحاك و لما يفهمك و يبتسملك عشان يعرفك انه فهمك و يبص فى عنيك و انت تضحك ضحكه اطفال كلها براءه ووضوح 
• فى ناس تحب تشوف الناس من بره و فى ناس تحب تعرف الناس من جوه اهتم بالجوهر و متهتمش بالقشره لان القشره هيجلها يوم و تتشوه لكن اللى جوه هو اللى هيدوم
• فى ناس يخلونا نشوف كل حاجه و كل تفصيله صغيره وسط الضلمه حلوه و فى ناس يخلونا نشوف كل حاجه وحشه حتى لو كنا فى وسط كنوز .... اختار الشخص اللى ينورلك طريقك و ركز فى كل حاجه هتلاقى وراها فرحه و  ضحكه و قول ديما الحمد لله :)
• ساعات كتيير ربنا بيبعتلنا هدايا الهدايا ممكن تكون طفل يديك امل ممكن بنوته حلوه تخليك مبسوط ممكن راجل كبييير فى السن يعلمك الصبر ممكن صاحب بيخاف عليك مش واخد بالك منه ..... لو بصيت حواليك هتلاقى هدايا كتيير احمد ربنا على الهدايا دى كلها :) و ركز فى كل حاجه حلوه حواليك و شوف كل حاجه حلوه و اوعى تخلى حاجه تزعلك
• الناس زى الالوان لون نحبه لون نكرهه لون منشفوش لون يخدعنا لون يفرحنا لون يحزنا لون نحب نغير كل حاجه عشان تليق عليه لون نحب نغير كل حاجه عشان نبعد عنه ......
• احلى ابتسامه لما تكون بتكتب حاجه لحد مش عارف هيفهما ولا لا مش عارف هيقراها ولا لا و مع اول لايك للكلمه اللى انت كتبها و تعرف انه فهمها و تبتسم ابتسامه خفيفه كده على انك اخترت الشخص المناسب اللى تكتب عشانه  :) 
• الناس المهمين فى حياتنا و بنحبهم زى الالوان و كل ما نخسر واحد منهم مش بتكون نهايه العالم بس بنحس ان لون من حياتنا اختفى لحد ما تفضل حياتنا ابيض و اسود ..... 

• الحب احساس جميل تفسده الحياه الماديه و يقضي عليه عدم تقديرنا لمن يصدق فى مشاعره

  
  

ايه الاخبار 5 التجريبى

ايه الأخبار

التاريخ :10/2/2009  اليوم:الثلاثاء   العدد: الرابع    جرنا ل: حسنكو لاى كلام

السعر : ببلاش لاعضاء جروب الفضوليين ليهات

________________________________________________________    

سياسه:-

انتهت الحرب على غزه و خلاص كل القنوات التلفزيونيه رجعت لمكنها و طبعا قناه البحث عن فضيحه(الجزيره) زعلانه اوى ان الحرب خلصت و ان المصريين معملوش حاجات من اللى هما بيحبوها و ان موقفهم الزباله بان و ظهر امام المصريين ان رحتهم بقت وحشه اوى و اصبح الان الكلام للكبار و العقلاء وليس لاصحاب الاصوات العاليه 

و من جهه اخرى تولى السيد باراك حسين اوباما رئاسه الولايات المتحده في حفل جامد جدا طبعا مبنشوفوش عندنا و كان احتفاليه كبيره جدا مبنشوفهاش غير بعد ما مصر تكسب بطوله

الاقتصاد:-

مازالت الازمه الاقتصاديه مستمره فى كل العالم ولكن لان مصر وضعها مختلف فكل دول العالم الاسعار عندها بتنزل الا مصر الاسعار بتزيد بتزيد بتزيد

الطقس :-

الجو انهارده شكله سقعه سقعه و كل واحد يلبس الدولاب كله و هو نازل بليل

و توقع خبراء الفشره الجويه ان الجو يفضل سقعه كده لشويه كام يوم

مواقف غريبه :-

فى اغرب المواقف و اغرب الفتاوى اللى سمعتها ان احد الاشخاص مقدرش اقول عليه شيخ قال الايرانين تقريبا قال ان حرام ان حد يحارب مع الفلسطينين ضد اسرائيل !!!!لا تعليق على الكلام ده طبعا

و برضه فى نفس الاتجاه صرح حزب الله اللى كان بيطالب الجيش المصرى بانه يعلن انقلابه على الرئيس قال انه مش صح انه يحارب مع الفلسطينين بالزمه ده كلام !!!!!

و الكوميديا بقى سمعت فى احد البرامج و كان الحديث مع شخص كبير و مسؤل فى الكويت زى الاخوان المسلمين فى مصر كده و بيقول اننا مش هنقطع علاقتنا مع امريكا لان امريكا بتساعدنا !!!!! و نفس الناس اللى كانت بتقول على مصر خاينه

ارحمونا بقى و مصر هتفضل كبيره مهما عملتو

رياضه:-

فاز النادى الاهلى ببطوله كاس السوبر الافريقى بعد تغلبه على نادى الصفاقسى بهدفين مبنشوفهمش غير فى السيرك من الساحر فلافيو :D

تم تعين السيد و النائب و المذيع و النائب و الدكتور و الاستاذ احمد شوبير مستشارا فنيا لاتحاد الكره طبعا يا جماعه ده كله عشان يا جماعه لما يجى يتكلم مع المستشار مرتضى منصور يقوله مفيش حد احسن من حد لو انت مستشار انا مستشار لو انت كنت نائب فانا كمان نائب !! ربنا يستر منلاقيش بكره دكتور احمد شوبير دكتور مخ و اعصاب

خلص عددنا انهارده و يا رب يعجبكو يمكن مش زى الاعداد اللى فاتت بس يا رب يعجبكو

و يمكن كان كلام كتيير فى السياسه  و الحرب على غزه بس لانى  مكتبتش حاجه من ساعتها 

ايه الاخبار 1 التجريبيه

اليوم :الخميس التاريخ:28/2/2008 الجرنال حسنكو لاى كلام
سياسه:-
قمه عربيه قريبه اوى عشان يدرسو اغنيه الضمير العربى و اللى حصل من تاثير على الشعب العربى من بعد الاغنيه .
________________...____________________...._____________...______
تحقيقات:_
من يوم 12/1/2008 لحد دلوقتى مش لاقين بدر 1 تاهت فى البحر يا عينى و صرح مصدر مسؤل انه تم الاتفاق مع عم توفيق و الشيخ بلاله عشان يعملو زار و يحرضو كام جن كده عشان يشوفو السفينه راحت فين و ربنا يوفقهم انشاء الله بس محتاجين دعوات الشعب عشان نلاقى السفينه .
و صرح مصدر اخر انه تم الاتفاق مع مراكب الصيد المزوده بميكروفونات عشان ينادو و يقولو " سفينه تايهه يا ولاد الحلال"
________________..__________________..._____________..._________
الاقتصاد:_
مازال ارتفاه اسعار البترول و الذهب لتصل الى اقصى ارتفاع و مازال طبعا الجنيه عايم
و نازل نازل نازل بس ديه سياسه
__________________...__________________.......___________________
الطقس:_
تسود جو من الهباب و السحابات السوداء نتيجه عوادم السيارات و المصانع و تسود شبوره هائله فى المنطقه العربيه نتيجه اللى بيحصل فى غزه و العراق ولا حياه لمن تنادى .
____________________....______________________..._______________
رياضه :_
طبعا كلنا عرفين ان الحضرى راح سويسرا و ناس بقى طلعو اشاعات انه هرب لكن فى حديث خاص لجريدتنا صرح عصام و قال " ايه يا جماعه انا رحت اشترى ساعه من سويسرا و الفاكسات اللى وصلت لنادى الاهلى ديه ان كنت بسالهم حد عايز ساعه من سويسرا " و الله الراجل اخلاق :D
_______________....___________....__________________...__________


كده انا خلصت  يا رب يعجبكو يا رب بليز رايكو عشان لو عجبكو اكمل انشاء الله و التوبيك ده هو عرض الاخبار بس بطريقه كوميديه شويه انشاء الله لو عجبكو هيبقى كل يوم انشاء الله

ايه الاخبار 2 التجريبيه

اليوم: الجمعه (اجازه) التاريخ 7/3/2008 العدد: التانى السعر ببلاش  الجرنال: حسنكو لاى كلام
______________________________________________________________
سياسه:-
طبعا بعد اللى بيحصل فى فلسطين ده الكل اتحرك و قام و مقعدش و كل القاده العربيه قامو و عايزين يعملو قمه عربيه طارئه عشان يكرمو فيها منتخب مصر اللى فاز بكاس الامم !!!!وكمان اسرائيل دلوقتى خلاص قربت تخلص على الفلسطينين ف بدرسو مين اللى يجى بعد فلسطين و طلبو من القمه انهم يعملو قرعه و يصفو على الفينل و يطلعو بلد واحده بس اللى عليها الدور و طبعا العرب استجابو لهذه الفكره السديده !!!!!!!!!!!!!!
______________________________________________________________
طرائف :-
فى بعض التصريحات من سيده عجوزه قالت " مكلتش اللحمه بقالى 3 شهور "
احب اقولها احمدى ربنا فيه ناس مشفوهاش خالص !!!!!!!
______________________________________________________________
محليات:-
طبعا اكيد كلنا سمعنا عن ان العيش هيبقى ديلفرى و هيوصل لحد البيوت بس فيه مشكله كبيره اوى انهم مش لاقين العيش اللى هيوصلوه للبيوت بالتوفيق انشاء الله !!
______________________________________________________________
البورصه:-
الجنيه لسه نازل نازل نازل و كلنا اكيد سمعنا عن الورقه فئه ال500 جنيه ففيه ناس قالو ازاى بقى هيعملو ورقه ب 500 و الموظف بيقبض 250 جنيه!!!! فعملو ايه بقى قالو انهم هيعملو روقه ام 500 ديه انها سهله القطه يعنى هيقطعوها من النص و كمان قالو انهم هيعملو الورقه بزرار يعنى تفك الزرار و تاخد الورقه يبقى هما كده عملو علاقات انسانيه و اجتماعيه رائعه مبين الموظفين لان كل موظف هيتقاسم الورقه مع زميله الموظف !!!!!!! والله ناس بتفكر
______________________________________________________________
الطقس :-
الجو اليومين دول حر اللى عايز يصيف يتفضل براحته بس رجاء لكل البنات متنزلوش بلبس البحر لسه الجو سقعه شويه !!!!
______________________________________________________________
رياضه :-
طبعا مجلس اداره النادى الاهلى عامل اجتماعات مغلقه عشان يعرف الساعات اللى جابها هل هى سويسريه الاصل ام صينيه ؟؟؟!!! و كمان بيبحثو يبعتو تقرير عن الفيفا عن نوع الساعه و كمان هو ليه مجبش لزميله عمرو ذكى اللى وسطه اتهرى رقص معاه فى دبى عيب يا حضرى
و من جهه اخرى فاز امس فريق الزمالك على اسمنت السويس فى مباره غريبع اثبتت ان الكره المصريه بخير بخير !!!!!!
______________________________________________________________
بكده يكون خلص العدد التانى لو عجبكو بليز ردودكو و قولو رايكو اكمل ولا كده كفايه ؟؟؟؟

ايه الاخبار 3 التجريبى

اليوم: السبت التاريخ:15/3/2008 العدد الثالث التجريبى الجرنال: حسنكو لاى كلام
السعر ببلاش
______________________________________________________________
سياسه:-
الرئيس مبارك راح زار بولندا لتوطيد العلاقات بين البلدين بس هى فيه حاجه غريبه مين بولندا ديه حد يقولو هولندا هى اللى فيها الطواحين مش بولندا ( عشنا و شوفنا بقينا نوطد العلافات مع بولندا ) بس برده يمكن يوضع سره فى اضعف خلقه!!!
______________________________________________________________
محليات :-
طبعا هنا فى الجروب بتاعنا فيه ناس قالت نقاطع المنتجات الدنماركيه و ناس قالت نعمل كده ليه المنتجات الدنماركيه مش كتير و كمان فيه منتجات مش عارفين مصدرها ايه بس ده مجرد راى لان احنا مش قادرين ننتج يبقى نسكت و نعمل نفسنا مش شايفين ده راى الناس الكبار طبعا بس راييى ان فيه حاجات للرفاهيه نقدر منجبهاش زى البيبسى و المنتجات ديه كلها و الشكولاتات ديه حاجات نقدر ان احنا منجبهاش لكن الحاجات اللى بلادنا العربيه مش قادره ننتجها يبقى نسمع كلام الناس الكبار . اما بالنسبه للمنتجات الاسرائيليه ف ديه لو هنموت لو قطعناها يبقى نموت احسن ما اخواتنا اللى فى فلسطين يموتو .
______________________________________________________________
الطقس:-
الجو اليومين دول حلو و كويس بس البنات بقى استعدو بموجه جامده جدا من اللبس اللى هيغزو بيه فى الصيف ان شاء الله ربنا يستر
______________________________________________________________
الاقتصاد:-
مازال سعر بير البترول فى تزايد مستمر و طبعا زى م احنا عرفين الجنيه نازل نازل نازل بس فيه ناس بتقول انهم عايزين يكتشفو طبقات الارض السفلى باستخدام الجنيه والله كويس.
______________________________________________________________
فنون :-
طبعا لان فيه ناس عايزه اخبار الفن ف احنا طبعا بنلبى طلبات كل الناس اشطه اهوه يا عم على
طبعا اكيد كلنا عارفين ان تامر حسنى هيعمل اعلان مع نانسى فى شركه كوكاكولا اكيد كد بقى كل البنات هيشربو كوكاكولا و الولاد هيعملو اقصه تامر حسنى
______________________________________________________________
رياضه:-
كالعاده و بالتخصص كسب الاهلى الزمالك 2/0 فى ماتش كان عادى و جاب الاجوان متعب تخصص اوسه و احمد فتحى اللى ان شاء الله هيبقى تخصص بمعاونه الكابتن الكبير بشير التابعى شكرا يا بوش بوش و صرح مصدر من داخل النادى الاهلى ان النادى الاهلى هيساعد كل الفرق اللى عايزه تشترى اوسه عشان متعب يجيب اجوان فى كل الفرق و الله بتصعبى عليا يا لقاء:D
______________________________________________________________
مسابقات :-
فى حاجه جديده ان شاء الله هحاول اعملها فى الجروب ان هنعمل سؤال و اللى يجاوبه صح هياخد هديه من الادمين
السؤال:_
السنه فيها كام اسبوع؟؟؟؟؟؟؟؟؟؟؟؟؟
______________________________________________________________
بكده العدد خلص و يا ريت بقى رددكو و اكمل و لا كده كفايه بجد اخر توبيك رددكو كانت قليله اوى عايز رددكو بصراحه بليييييييييز

ايه الاخبار العدد 4 التجريبى

جرنال : حسنكو لاى كلام اليوم الجمعه اجازه التاريخ : 10/10/2008 السعر : ببلاش  العدد : الرابع  التجريبى
___________________________________________________________________________________
سياسه:-
مازالت المباحثات الفلسطينيه الاسرائيليه مستمره و اتفقو على لا شىء و يبقى الوضع كما هو عليه و على المتضرر اللجوء للقضاء ...!!!!!! (ماي اخذ بالقوه لا يسترد الا بالقوه رحمك الله يا سادات )

نسمع الان فى مكان ما يدعى امريكا تاريخها فقط بدأ من حوالى 200 سنه عن اجراء انتخابات رئاسيه و مناظره بين المرشحين للرئاسه اخر مره سمعتها فى دوله عربيه كانت امتى يا ربى امتىى امتى ...!!!!!!!!!!!!! مش فاكر
___________________________________________________________________________________
محليات :-
طبعا احنا هنا فى مصر كل يوم بليل بنقطع نفس بسبب السحابه السوده و حرق قش الرز و لاننا فى مصر خالف تعرف لان الحكومه بتقول متحرقوش قش الرز يقومو الفلاحين حرقين قش الرز زى برضه ما اول ما عملو وزاره للبيئه بقينا نسمع عن العربيات اللى وراها 10 كيلو دخان طالعه من وره
خالف تعرف !!!!!!!!!!!!! و طبعا الحكومه مش سكته و اتفقت مع احدى شركات المحمول انها تبعت رسايل للناس عشان توعيهم و الله حكومه شطره و بيقولو فى الرساله بحرقك لقشك بتأذى بلدك اوعى حد يحرق قشه يا جماعه قشك امانه فى رقبتك هههههههه !!!!!!!!!
___________________________________________________________________________________
اقتصاد:-
مازال كل العملات الاجنبيه ناازله نازله نازله و البورصه نازله نازله و كل دول العالم بدور على حلوول و لكن الجميل بقى فى مصر ان كل يوم يطلعو يقولو ان البورصه نازله لكن حجم الاستثمارات زى ما هى و ان مفيش اى مشاكل فى مصر يعنى الحمد لله كل دول العالم فى ازمه الا مصر
___________________________________________________________________________________
فنون:-
فاجىء الفنان تيمو جمهوره على المسرح فى حفلته الاخيره انه طلع ب تى شيرت قط و المفجأه طبعا زى ما انتو عرفين ان تيمو معود جمهوره انه يطله بقميص مفنوح كل زرايره عشان يبين شعر صدره لكن المفاجأه بقى ان تيمو كسر القاعده و طلع ب تى شيرت قط الله عليك يا نجك من يومك نجم كبير
___________________________________________________________________________________
رياضه:_
يستعد المكنتخب المصرى للمباراه المهمه و القويه جدا جدا جدا امام جيبوتى و صرح المدير الفنى بانه حشد جميع قوى الفريق من اجل الفوز فى المباراه المهمه القادمه و طلب من الجمهور المصرى انه يدعى للفريق بالفوز ( ديه جيبوتى هو احنا بنلاعب البرازيل :D)
___________________________________________________________________________________
بكده خلص عدد انهارده يا رب يكون عجبكو و رايكم مهم عشان اكتب تانى ولا كده كفايه اوى

ايه الاخبار 1

جرنال : حسنكو لاى كلام    التاريخ : 10/3/2010  العدد مش فاكر الكام بقالى كتيير مكتبتش ازمه اقتصاديه بقى    السعر : ببلاش 

ل اللى ميعرفش ايه الاخبار احب اقوله ان ايه الاخبار ديه عباره عن شويه اخبار حقيقيه بطريقه كوميديه

سياسه :

الحمد لله الرئيس قام با لسلامه  و بقى ياكل اكل خفيف و بيتمشى فى الاوضه  و طبعا الريس قبل ما يعمل العمليه قال لنظيف مصر امانه فر رقبتك يا نظيف  و بصراحه نظيف مظبط البد و تقريبا العروسه وشها حلو ربنا يستر على الشعب بقى احسن شكلها هتقضى علينا كلنا .

مازال العرب بيتفرجو على ماتشات الشامبيونز ليج و ناسيين فلسطين و اللى كمان كام سنه هنصحى مش هنلقيها و من دلوقتى سامع ان العرب بيتفقو مع مناديه عشان يندهو حد لقى فلسطين يا ولاد الحلا !!!

اقتصاد :-

طبعا اعدت فتره كبيره الجرنال بتاعى مينزلش الاسواق عشان الازمه الاقتصاديه و قلت برضه لوفر شويه :D و كمان لان السولار مش موجود و الانابيب زهقت مننا و نفست بجلدها و العيش بقى متوافر جداا لدرجه اننا بقينا بناكله للفراخ و بنعمله طعميه بعد ما يعفن ان شاء الله  و كل واحد يسخن رجله عشان اللى بعد كده عايز يروح مكان هياخدها مشى لان مش هيبقى فيه بنزين ولا سولار يمكن ميبقاش فيه مايه كمان  و هنرجع بقى للزمن الجميل زمن الجمال و مياه الآبار .

الطقس :-

بدأ الجو يحرر بقى و ربنا يستر و احب اناشد اخوتنا البنات بلاش تتطلعو من هدمكو و بلاش البكينى كفايه ان الجو حرر

فن :-

ما شاء الله ما شاء الله فيه افلام كتييره موجوده فى الاسواق و الحمد لله كلها افلام محترمه جدا جدا  و انصح جميع افراد العائله انها تدخل السينما و اوعدهم انهم هيشوفه افلام هادفه هادفه هادفه يعنى  و ممنوع اصطحاب الاطعمه

رياضه :-

الحضرى بتاع البطيخ و المانجه مدوخ اللى شربوا المانجه و مش عرفين ياخدوا منه لا حق ولا باطل و احب اشكر كابتن مصر و اقوله اثبت انك وفى جدا يا كابتن و مصلحه اللى عملته فى اللى كانزا فكرينك مكسب بجد و بيغيظو بيه الاهلاويه بس هو ده الحضرى

الزمالك مع  العميد بقى زمالك و نازل يكسب فى اى فريق و سبحان الله و شكلها كده هنرجع بقى للمنافسه بين القمه بجد الاهلى و الزمالك و هيبقى دوري شيكلو حلو على راى كابتن محمود بكر

مازال صراع الكابتن شوبير و المستشار مرتضى منصور مستمر و مرتضى ضرب شوبير جامد اوى و خلاه يبطل يطلع فى التلفزيون و ريحنا منه شويه و خسره الدعايا الانتخابيه اللى كان هيعملها من خلال برنامجه اللى ملك الجماهير 

بس فاكرين لمل قلتلكو ربنا يستر و منلقيش شوبير دكتور مخ و اعصاب اهو هيبقى بدل الشيف حسن و هيقدم برامج طبييخ ربنا يستر بقى و يعمل برنامج عن الطفوله

كده خلص عدد انهارده و يا رب يكون زى اللى كنت بكتبه قبل كده و يا رب يكون عجبكو ان شاء الله