ايه الاخبار 13

جرنال : حسنكو لاى كلام      العدد : الثالث عشر "ربنا يستر "     اليوم : الخميس      التاريخ 5/1/2011      السعر : ببلاش  دائما و ابدا المهم الناس تقرا

______________________________________________________________________
سياسه :-

صرح المجلس الاعلى للصباع احم احم اقصد المجلس الاعلى للقوات المسلحه بان هناك اصابع خفيه تريد بالدوله السوء و طبعا لان مصر  فيها اعظم جهاز مخابرات فى العالم و عندها اقوى اجهزه شرطيه فطبعا الحمد لله قدرنا نكتشف ان فيه صباع و ايد بيلعبو بس الحمد لله لسه محددناش مكان اللعب اسف مكان الصباع  برضه بتيجى فيها قله ادب هو عموما هما حاطين اديهم على الدليل و هو ان مصر فيها طرف تالت . ^_^ و الله الموفق  و المستعان
الحمد لله اخيرا الثوره بدأت تؤتى ثمارها و بقى فيه حد اقصى للاجور مع بعض الاستثناءات البسيطه اوى يعنى ان كل اللى بياخدوا حد اقصى يفضلو زى ما هما و محدش يطلعلهم عاش مصر الثوره
فى مرافعه النيابه المهيبه و المستشار بيقول ان الجهات الامنيه لم تعاون النيابه اثناء التحقيق الجميع فوجىء و استعجب ازاى الشرطه اللى اعاد هيكلتها و بقى فيها ناس محترمين بيقولو ان مصر مفيهاش قناصه ميساعدوش النيابه بس الحمد لله يا جماعه اكييد دلوقتى عرفنا ان مصر فيها طرف تالت هو اكيد مش الشرطه بس هى الناس اللى اعاقت شغل النيابه

طبعا مصر بتشهد انتخابات حره نزيهه و طبعا مفيهاش اى تأثير ضد المبادىء و القيم و القوانين و ده لان اعضاء مجلس الشعب هما الناس اللى هيوضعو القانون فطبعا كان لازم يرفضو ان يلتفو و يخدعوا الناس بالاضافه ان الاغلبيه من التيار الاسلامى اللى لا و الف لا ابدا ان يخالف القانون من اجل مصلحتهم

بعض الاقاويل من اصحاب النفوس الضعيفه بتقول ان مبارك هياخد براءه الحقيقه معرفش جابو الكلام المسىء ده منين و ازاى يعنى ياخد براءه انا حاسس انهم ناقص يقولو بقى انا يرشح نفسه فى الانتخابات بعد ما يثبت براءته ..... اخترناه اخترناااه و عم  رو مصطفى يغنى حقك عليا ....::::: و فريد الديب يطلع يقول قائد الثوره و تامر امين يقول عاش حبيب الملاييين و مذيع المصريه تقول هيييه بابا جيه ... احم احم سرحت بس فى اللى كنت هكتبه لما مبارك يبقى رئيس جمهوريه ^_^

______________________________________________________________________

اعلام

قبل الثوره كانت القنوات الرياضيه تمتاز باللت و العجن فكان لازم و اكييد بعد الثوره القنوات دى تبطل لت و عجن لكن الحقيقه هما مبطلوش بس اللى اتعدى منهم هما القنوات التانيه و بقوا بيحللو الانتخابات بنفس منطق القنوات الرياضيه يعنى مثلا تلاقى الضيف اعد و هو بيتابع و هب يدخل رجل بدقن "يالهوووى دقن دقن هيأثر على كل اللى فى اللجنه و هيجيب جوون " طبعا اللى بيحصل ده اكييد يقول الناس اختارت الاسلاميين لييه لانهم ناس بتوع ربنا و قنواتهم بتتكلم فى الدين بس الواقع بقى ان حتى القنوات الدينيه هى كمان بقت تلت و تعجن يعنى مثلا و هما بيتابعو الانتخابات " واحد شعره طوييييل يا الله كافر ملحد ليبرالى هيفسد كل اللى حواليه "  مش عارف الناس نزلت انتخبت لييه اصلا !

______________________________________________________________________

اعلانات :-
ايد الست تعلن شركه ايد الست عن جميع منتجات الحلويات صوابع بلح الشام صوابع جلاش صوابع كنافه و ده كل انوع صوابع الحلويات وتعلن الشركه عن توصيل الطلبات الى المنازل عن طريق الايادى الخفيه اتصل على 122 يصلك مندوبنا لحد باب البيت

______________________________________________________________________
طرق و كبارى :-

الحقيقه هيئه الطرق و الكبارى مشكوره بدأت انها تعمل عوائق مرور سيارات (مطبات صناعيه سابقا) على الطرق السريعه و الحقيقه مشكورين لما حاولنا نسألهم قالو ان هما عملين كده عشان الساده البلطجيه يسهلو عليهم عمليات السرقه و كمان يعنى برضه ميصحش يا جماعه ان البلطجى عشان يسرق العربيه و ياخدها ياخدها و هى متجرحه لازم يخدها مفيهاش غلطه الحمد لله فى مصر مسؤلين بيتقنوا فى عملهم و شايفين شغلهم على اكمل وجه

______________________________________________________________________
رياضه:-

بعد اللى حصل فى المحله و الناس المغرضين اللى بيقولو الكوره جوون ازاى يعنى ها ازااااى يعنى نصدق الكاميرا و منصدقش اللاعب اللى بينه و بين الجون كام يارده الحقيقه انا بسعجب على الناس اللى بتشكك دى و كمان دلوقتى الفوتو شوب وصل لكل مكان مش هيوصل ملاعب الكوره اللى يمسيك بالخير يا عمرو .. لاوم نكون واقعيين اكتر من كده و كمان فيها ايه يعنى اللاعيب مسك راسو هو متعود كل ما يجيب جون اسف كل ما يطلع الكوره اوت يعمل كده لاعيب هداف يا جماعه .

______________________________________________________________________
بكده خلص عدد انهارده اتمنى دمى ميكونش تقيل و اتمنى انه يعجبكم و يا رب رقم 13 يكون فال خيير ان شاء الله 

هلوسه طالب

الدنيا عمله زى الطماطم يا اما تهرسها يا اما تترمى عليك مهروسه 

مش مهم الناس تتكلم عنك كويس المهم جواك يشوفك كويس !!  

الفيس بوك ايام الامتحانات تحس بالونس كده كله موجود :D الامتحانات مصيبه مهببه بتجمعنا كلنا