ايه الاخبار 12

الجرنال : حسنكو لاى كلام            العدد : الثانى عشر         التاريخ : 14/12 /2011        اليوم : الاربعاء    السعر ببلاش جابو حكومه جديده بسياسه جديده و ربنا يستر

____________________________________________________________________________

سياسه :-

بعد ما المجلس العسكرى دعا لانشاء مجلس استشارى فى نفس الوقت اللى كان بيتعمل مجلس وزرا و فى الوقت اللى كان بيتعمل انتخابات مجلس الشعب .. خرج علينا احد قاده المجلس العسكرى و قال " اننا هنعمل الدستور و مجلس الشعب يعنى مش بيعبر عن الناس و احنا طبعا هنكون اكثر قوه فى التعبير عن الناس " و الحقيقه هذا الكلام ناس كتيير قبلته برفض شديد مع ان الحقيقه يا جماعه كتر خيرهم  شافو اد ايه الشعب وقف طوابير و تعب فقاله يريحوه شويه بقى و مش كل شويه ينزله و يقولو رايهم و اديهم تتوسخ بالحبر الفيسفورى فهما مشكوريين حبوا يريحونا لكن احنا شعب مبيطمرش فيه ابدا الخيير ولا الغاز و الخرطوش .....

بالنسبه بقى للناس اللى بتنتقد نظام الانتخابات المصرى و هو في انتخابات تفضل يومين كاملين الحقيقه مش عارف الناس دى عايزه ايه و كمان لازم نتعلم من الامم المتحده بقالها كام شهر بتعمل تصويت على عضويه فلسطين و لسه ماعلنتش النتيجه مع ان النتيجه اصلا معروف انما عندنا بنصوت فى يومين و نفرز فى تلاته و النتيجه مبنعرفهاش يعنى  هنبقى احسن من الامم المتحده يجبولنا مبارك تانى يعنى ولا ايه الحقيقه هو الوحيد اللى كان قادر على انه يعمل انتخابات يناطح بها الامم المتحده النتيجه معروفها يومها الصبح و التصويت يوم واحد ولا طوابير ولا قضاه و لا جيش هماا الشرطه و البلطجيه ايد واحده

خير الله ما اجعله خيير فوجىء بعض اهالى الدوائر الانتخابيه انهارده بان لجنتهم مش هيبقى فيها انتخابات على القوائم و ده لان صدر قرار من المحكمه بتعديل اسماء القوائم و حاجات كده عمرنا ما فهمناها ولا هنفهمها و طبعا هذا القرار الحكيم صدر بعد تصويت المصريين فى الخارج و احب اقول لاصحاب القلوب الضعيفه اللى بقى عايز يقول ان الحوار ده كله عشان يحصل طعن على الانتخابات و يتم حل مجلس الشعب و ميبقاش عندنا غير مجلس واحد اوحد  و يبقى القائد الاعلى للثورره المصريه و مفجرها و زعيمها و قائدها الزعيم القائد الدكتور البشمهندس ال...............ى  و هو اللى يحط الدستور و يحط على الشعب ...

بعد تصريح وزير الداخليه السابق منصور العيسوى بانه قال ان الشرطه مضربتش خرطوش و انهم مضربوش غاز و من قبلها ان الداخليه مفيهاش قناصه و من قبله محمود وجدى اللى قال ان الداخليه مفيهاش قناصه و كمان كام يوم هيجى يوم 25 يناير و يحتفلو بعيد الشرطه و يقولو مصر مفيهاش ثوره !!!!! هاااااااااااااااااااءاو
____________________________________________________________________________

اعلام :-

الحقيقه فى جميع القنوات المصريه الخاصه بعد ما تاخد الاخوان غسيل و مكوه و نقد و ابداء اراء فيهم بصراحه و مع اول فاصل اعلانى تجد اعلان الحريه و العداله و طبعا الفرق كبيير بين الاخوان و الحزب بالظبط كده زى مبارك و الحزب الوطنى .
فى تصريح خطيير صرح بيه خبير استراتيجى لاحد القنوات الفضائيه باسباب اصابابته فى التواء فى القدم انه و هو خارج من برنامج الاولانى رايح يلحق البرنامج التانى عشان عنده طلعه فى البرنامج الثالث فراح متكعبل فى سلك الكاميرا و صرح و قال" انه بيحمل المجلس العسكرى المسؤليه كامله عن اللى حصله ده و انه هيعتصم فى البيت لحد ما رجله تخف....الغريب فى الموضوع بقى ان الخبراء دول هما هما اللى كانوا بيطلعوا ايام مبارك و يقولو مصر تعيش ازهى عصور الديمقراطيه الله يمسيك بالخير يا على الدين يا هلال ... هو فيييين صحيح ؟!!! لو تعرف بلغ عنه ....

____________________________________________________________________________

سياحه :-

بعد التصريحات الناريه اللى مورناش غيرها ان مصر مش هيبقى فيها بكينى :O ولا خمره ولا اثار :O اكيييد طبعا السياح خافو و مش هيجو مصر قال يعنى هما كانو جم قبل كده ... وطبعا يا جماعه المواطن الاوربى لما بيجى مصر بيقى مهم عنده كده انه يلبس البكينى لان البكينى جزء لا ينجزا من السايح امال يبقى اسمه سايح ازاى !!!!....

____________________________________________________________________________

رياضه :-

حبيت انهارده اتكلم عن الرياضه من حته مختلفه شويه عشان الناس اللى بتتكلم على ان الكوره فى مصر مش اد كده وشوفو الدورى الاسبانى فانحنا حبينا نعمل هذه المقارنه و المقارنه هنعملها بين المشجع المصرى و المشجع الاسبانى و فى ماتش الاهلى و الزمالك اولا المشجع المصرى لازم يصحى من 6 الصبح يقف ادام باب النادى عشان يجيب تذكره و مش بيبقى لوحده بيبقى معاه الاف غيره و شوفو التلاحم اللى بيحصل عشان يجيب تذكره و يحس بقيمه التذكره اللى معاه و انه تعب اد ايييه عشان يجبها ... المشجع الاسبانى يفتح اللاب توب بتاعه و يحجز تذكره من غيير ما يحس بقيمه التذكره اللى اشتراها ,, المشحع المصرى يوم الماتش يقف بره الاستاد من الصبح عشان يحضر الماتش بليل و هو داخل بيتحشر كده و بيتزنق و يتلاحم مع جمهور فريقه و مش بعيد يبوس الحصان بتاع الشرطه و يدخل الاستاد يلاقى اى كرسى و يفضل يشجع 4 ساعات كامله قبل الماتش و يحس بمتعه الفلوس الى دفعها فى التذكره المشجع الاسبانى يروح قبل الماتش ما يبدأ ب خمس دقايق يلاقى كرسيه موجود مفييش اثاره فى الموضوع .. و كمان فى اسبانيا معندهمش شلبوكا "هلا هلا" يشكر الامن عشان التنظيم الروعه روعه اللى هما عملينه ده
____________________________________________________________________________

اخدنا ايه من الثوره :-

قبل الثوره كان كل الناس بتتكلم عن الكوره ...... اما دلوقتى فكل الناس بتتكلم فى السياسه

قبل الانتخابات كانت كل الناس بتتكلم عن الليبراليه ...... بعد الانتخابات كل الناس بتتكلم فى الدين حتى الليبرالين نفسهم

قبل الثوره كانت الستات الصبح تصحى تتكلم و ترغى فى هنطبخ ايه انهارده ......
و البنات يرغو فى تامر حسنى و شفتى المسلسل التركى ..................
و الولاد يتكلمو هنشوف الماتش فيين و هنخرج فيين انهارده ............
و دلوقتى كل دول بقو يتكلموا هنرشح ميين فى الانتخابات

______________________________________________________________________________

سؤال العدد :-

نقصد ميين بالقائد الاعلى للثوره المصريه اللى تم ذكره فى سياسه ؟؟؟؟؟
1- احمد مكى فى فيلم طيير انت لماا عمل دور القائد

2- استاذ غسان مطر فى فيلم لا تراجع ولا استسلام

3- ال .............. تييييييييييييييت ...... لامؤاخده فيه رقابه لسه على الصحف

لو عرفته الاجابه ابعتوها على الايميل بتاعنا حسنكو دوت كوم

____________________________________________________________________________

بكده خلص عدد انهارده جايز مش زى كل مره بس لان الظروف مش قد كده و يا رب يعجبكو