ايه الاخبار 4

جرنال حسنكو لاى كلام          العدد : الرابع ان شاء الله          التاريخ:      29/10/2010       السعر : اكييد ببلاش على طوول و ديما

  سياسه :-

تستعد مصر لبدأ اجراء انتخابات غايه فى النزاهه و الشفافيه جدا اوى خالص و بعيده كل البعد عن اى مظاهر البلطجه و التزوير كعاده الانتخابات فى مصر دائما ( هو بقى حد يروح اصلا )  و طبعا و انت ماشى فى اى مكان كده هتلاقى فى وشك صوره واحد كده ايا كان شكله لابس بدله كده و كاتب تحت الصوره بتاعته بحبكو بحبكو و بلييز رشحونى من فضلكو او صوتك يهمنا او ادينى صوتك اخد منك عيالك و فلوسك و اى حاجه معاك .... و طبعا مش لازم ننسى ابدا القرار الحكيم من سياده الرئيس بوجود مقاعد للمراه فى مجلس الشعب و ده طبعا يا جماعه قرار خكييم جدا ليييه بقى لان نسبه الغياااب و النووم فى مجلس الشعب كانت كبيره جدا و بهذا القرار هيبقى كل عضو من الاعضاء هيخاف على مظهره امام زميلته العضوه و اكيييد هيزود نسبه الحضور و يجعله عامر

بمناسبه الانتخابات ففى حاجه مهمه جدا لو انت كده لاقدر الله مشيت فى طريق سريع و لاقيت جته تمشى فيها ممكن تلاقى صوره مرشح من المرشحين لمجلس الشعب خاطتلك صورته على  اللوحه اللى بتقلك احظر مطب صناعى مثلا ( كده كده هتلبسه اصلا المطب عدا ) او مكان مثلا للذهاب لمكان ما الزم يمين طبعا مش مهم انت المهم ان المرشح يحط صورته

فن و ثقافه :-

بعد ما لوحه زهره الخشخاش اتسرقت و تم اتهام محسن شعلان فى انه السبب و محسن شعلان اتهم الوزير فاروق حسنى انه مشفش اصلا المتحف اللى اتسرقت منه اللوحه ده مع انه جنب مكتبه بعدها طلع طبعا الوزير و صرح ايه يعنى لوحه ب 53 مليون جنيه يعنى احنا شعب غنى و الحرامى ربنا موفقوش و اخد باقى اللوح الموجوده (ربنا يوفقه المره الجايه ان شاء الله ) و طبعا لان محسن شعلان راجل شايف شغله كويس و لوحه واحده بس اللى اتسرقت الوزير فاروق حسنى عينه المستشار رقم واحد لييه لانه طبعا يا جماعه راجل شايف شغله على اكمل وجه ( اللى اختشه انتحروا ) و هى ديه مصر يا جماعه بتدى ديما ل اللى بياخد منها قصدى بيتعب عشنها

زراعه :

الحمد لله الطماطم ربنا هداها شويه و اسعارها نزلت و ده طبعا بفضل توجيهات سياده الرئيس لوزير الصحه وو زير الداخليه بسرعه التعامل مع القوطه و انهم يشوفوها بجد مجنونه ولا بتستهبل و بالفعل نجحت جميع قوى الشعب و الحكومه من اجل الضغط على القوطه و انها تنخضع لرغبات الشعب و سعرها ينزل لحد 5 جنيه و الحمد لله

ذهب و لم يعد  :-

فقد يا ولاد الحلال قمر صناعى مصرى كان بيستخدم فى البحث العلمى زى ما بيقوله و تقريبا كده من كتر الاستخدامات اللى استخدم فيها مقدرش يستحمل راح فاكك و شاف بلد تانيه ميكنش عندها بحوث كتيره زى مصر كده  و يكون مرتاح فيها و طبعا مش لازم ننسى تصريحات المسؤلين و اننا رحنا و سالناهم عن اسباب اختفاء القمر الصناعى و الحلول اللى هيتبعوها طبعا هما قالوا انهم هيكلموا بعض المسؤلين عن الجن و العفاريت عشان يشوفو القمر الوحش ده راح فيين و ميين مش محترم عمل كده و طبعا يا جماعه القمر الصناعى ده معمول ب 2 جنيه و نص مش مكلف يعنى و الحمد لله على كل شىء

رياضه :-

حسام البدرى مدرب الاهلى الحمد لله لقى شماعه يعلق عليها كل حاجه غلط هو عملها و لبس الموضوع كله للحكم الواعى جدا المصحصح الفايق الرايق اللى حكم ماتش الترجى و الاهلى  و طبعا يا جماعه الشىء الجميل اللى فى الحكم انه كان بيتفرج على نفسه فى الشاشه اللى فى الملعب و بيشوف شكله شيك ولا لا برضه يا جماعه الراجل اكلوه اكله تقيله شويه لازم يشوف باين عليه اوى ولا لا

فى ماتش الشباب بين منتخب مصر و السنغال جمهور السنغال كان بيضرب فى الامن طبعا احنا لازم نشكر الامن على حسن تعامله مع جمهور السنغال  و حسن الضيافه اللى مصر مشهوره بيه  و اهم شىء ادى افاك للغريب يضربك و ينبسط بييك .......