ايه الاخبار 3

جرنال : حسنكو لاى كلام         التاريخ 6/9/2010                      اليوم : الاثنين          العدد : مش فاكر      السعر   ببلاش ديما هو حد بيشترى جرايد

سياسه :

بدأت المفاوضات المباشره بين كلا من فلسطين و اسرائيل و للمره المش فاكر كام يتلموا مع بعض و يعملو جلسات   و اعدات و مؤتمرات صحفيه  و فى الاخر النتيجه يبقى الوضع كما هو عليه و على المتضرر يخبط راسه فى الحيط و يدورله على حته تانيه يعيش فيها لان الاستيطان مش هيخلى فى ارضه عشان يعيش فيها !!!

و طبعا لازم مننساش مجهودات ريسنا ربنا يديله الصحه و يدخل الانتخابات اللى جايه و اللى بعد الجايه كمان و طبعا مجهودات الريس وصلت لحديث صحفى مع نيويورك تايمز ان لازم نبدا من حيث ما انتهت المفاوضات السابقه و اظاهر ان ريسنا نسى ان المفاوضات كلها كانت بتنتهى عند الصفر و تحت الصفر كمان و طبعا من التصريحات ديه زى ما الصحف كلها اعلنت انه وضع الجانب الاسرائيلى فى مازق و ده طبعا بدليل ان الرئيس الاسرائيلى قال ان ديه ارض اجدادنا و امرنا لله هنقبل شركاء فيها ...... واضح طبعا ان المفاوضات بدأت من حيث ما انتهينا و اننا خلينا اسرائيل فى مأزق !!!!

حوادث :

بعد سرفه لوحه زهره الخشخاش اللى تمنها 50 مليون دولار و طبعا يا جماعه ديه اتسرقت بالرغم من احكام التامين ليها جدا يعنى اللى سرقها ده شخص مدرب جدا جدا على انه يخترق اشعه الليزر و انه يبوظ كاميرات المراقبه ده غير انه بقى يقدر على الغفير اللى واقف بيحرس المتحف اسف رجال الامن اللى بيحرسوا المتحف

بس انا مش فاهم يا جماعه الناس زعلانه ليييه   عادى يا جماعه زى ما الناس بطلع زكاه الفطر الحكومه كمان لازم تتطلع ذكاه و كل برغوت على اد دمه

بس الجميل بقى ان كان فيه اقتراح بيقول اننا نبيع اللوح ديه و نسدد بيه ديون مصر و الحقيقه الكلام كان جميل لكن اعترض وزير الثقافه و هو برضه الراجل معاه حق يا جماعه يعنى مصر لا عندها اثار ولا مناطق سياحيه عشان نجذب السياح احنا هنجيب السياح و نوريهم فيلم تسجيلى ازاى تسرق لوحه من اسهل متاحف مصر

فن :

طبعا مع بدأ شهر القرآن و الصيام بيبدأ معاه برضه شهر المسلسلات و البرامج و لكن الحقيقه احنا لازم نشكر المسؤلين عن الاعلام المصرى و العربى لان الحقيقه كم المسلسلات و البرامج اللى كلها اهجاف ساميه و تعلى من القيم الاخلاقيه و الانسانيه مشفتش مسلسل فيه كلام خارج ولا اى حاجه بعيده عن عادتنا و تقاليدنا فالحقيقه شكر خاص لجميع المسؤليين و كمان لو فاتتك حلقه من مسلسل تحس انك عادى جدا ممكن تقهم اللى حصل من الحلقه الاخيره للمسلسل و ده طبعا لان فيه 60 مسلسل و هيبقى صعب انك تتابعهم كلهم فبرضه لازم نشكر المسؤلين عن المسلسلات لانهم حاسي بالناس اللى بيتفرجو

رياضه :

الحمد لله استطاع المنتخب المصرى اقتناص نقطه ثمينه من افواه اسود و ووحوش و افيال و الفريق الاقوى فى العالم سيراليون و ده طبعا بفضل تكتيك الكابتن المعلم حسن شحاته اللى قال انه مشفش اى فيديو للفريق و انه سعيد باداء لاعيبه منتخب مصر لانهم كانوا رجاله ادام هذا الفريق القوى

مواقف و طرائف الشعب المصرى :

طبعا فى رمضان بنشوف حاجات غريبه اوى تلاقى الولد مننا كده مربى دقنه و فى ايده المصحف و رايح يصلى التراويح فى الجامه و فى ايده السواك و يعنى تشوفه تقول عليه ربنا يجميه يارب و تلاقيه وقور كده و هادى و سبحان الله تلاقيه اول يوم العيد نازل يعاكس فى بنات و شتيمه بقى و مش بعيد كل ده يحصل و احنا لسه فى رمضان و لسه طالع من الجامع

نيجى بقى على البنات تلاقيهم خير الله ما اجعله خيير نازليم لابسين اسدال او عبايه و رايحين يصلوا و تقول عليهم ما شاء الله ربنا يحميهم يا رب و بعد الصلاه تلاقى لا فيه عبايه ولا فيه اسدال تلاقى بس لابسين و نازلين البحر تفريبا !!!! ده غير بقى اللى قبل المغرب بحجاب و بعد المغرب بحجاب والله حاجه و رمضان كريم

بكده خلص عدد انهارده اللى يا رب يعجبكو و ميكنش دمى تقيل فيه !!........