ايه الاخبار 17

جرنال حسنكو لاى كلام اليوم : الجمعه  التاريخ :   21/12/2012  نهايه العالم زى ما وكاله ناسا قالت و رجعت فى كلامها و محدش يربط بين ان مرسى كان شغال فى ناسا و اللى حصل ده                       العدد : السابع عشر 

 ____________________________________________________________________________

عندنا بس و مش عند اى حد تانى كل الاخبار الساخنه و كل الفضائح و كل الخطوط الحمرا هنتخطاها و سيبك من طونى و الابراشى عندنا الحرايق كلها بشكل حصرى !!... الحقيقه مش قادر افهم ليه يبقى فيه حاجه اسمها اخبار ساخنه و وضع ملتهب و برامج اشك ان اغلبيه اللى بيجو فيها بيكونو كومبارسات و مش فاهم ايه هى القضايا الساخنه اللى تيجى فى الرياضه عشان شوشو سلطات و لا مدحت كلاوى و لا شبانه يعملو عليها كل البروباجاندا دى !!... ليه ميكنش خبر عادى مهم ليه الحق الكارثه عربيه عدى من قدامها حمار و الحمار سليم الحمد لله !.!.. لو بدور ع الكلام ده فمش هتلاقيه عندنا ... ____________________________________________________________________________

سياسه :-

تشهد مصر هذه الايام اكبر و اعظم عرس " بضم ال ع " و اللى عايز يقراها بتشكيل تانى هو حر احنا فى عصر الحريات و مفيش حد بيحاصر ولا بيحرق فى صحف ولا مدينه انتاج نرجع بقى للعرس الديمقراطى اللى بتشهده مصر  على الاستفتاء ع الدستور اللى تم التوافق عليه بنسبه 90 % من الشعب و الناس بتاخد بعضها بالحضن و ذلك بعد ان دعى السيد الرئيس محمد خيرت بديع الاخوان الى الاستفتاء ع الدستور و ان يقول الشعب كلمته و طبعا رئيس كل المصريين حاول يحمى الدستور اللى مشفتوش مصر طول حياتها ولا هتشوفه ان شاء الله و اصدر اعلان دستورى عشان يحمى الاستفتاء ده من مؤامره خبيثه كانت بتحاول تعملها اسرائيل و امريكا و بعض من المخربين من الداخل اللى كانو اعدين فى حاره مزنوقه كانو محصورين و بيفكو .. شفاكم الله و عفاكم و طبعا لان النظام القديم لسه موجود فى السجون طبعا فهو بيخطط لقلب نظام الحكم وخطف الرئيس فى شوال و يودوه الامارات .. فأصدر الرئيس الاعلان الدستورى الاول و اللى شال فيه النائب العام و حصن التأسيسيه و حصن مجلس الشورى و عين نائب عام جديد شريييف . و من كتر م الناس سعيده بقرارات الرئيس نزلت تهتف ادام القصر و كانت عايزه الرئيس ينزل عشان يخدوه بالحضن بس للاسف فيه قله قليله منهم اتهجمت على عربيه الرئيس و عورت السائق و اصابته خطيره و يتم علاجه على سرير سياده الرئيس لان الرئيس كان بيحلم لان الكلام ده كله من وحى و تأليف مكتب الارشاد والبث الحصرى لقناه مصر 25 و الجزيره و شكر خاص لوزاره داخليه الاخوان. و على المتضرر اللجوء للقضاء اللى مش هيلاقيه او هيلاقيه متحاصر او لو لقى حد فهيتحبس لان النائب العام بياخد على خاطره لما الريس محمد خيرت بديع الاخوان يزعل

........................................................ بعد اى ثوره طبعا لازم يتعمل دستور جديد يرسخ لمبادىء و قيم الثوره و طبعا لان ثورتنا نجحت فكان الطبيعى اننا نعمل دستور عليه توافق و تم اختيار اللجنه التأسيسيه للدستور من خلال مجلس الشعب و الشورى الاخوان و تم تشكيل اللجنه التأسيسيه تقريبا كلها اخوان قامو عملو دستور الاخوان قام الرئيس الاخوان حمى دستور الاخوان و مجلس شورى الاخوان و حصن نفسه بالمره كمان  قا قامت الناس معترضه قام الرئيس الاخوان طلع يقول دول خونه و كدابين و عملاء قامت الناس راحتلو لحد القصر قام الرئيس الاخوان هرب من الباب الخلفى ... قام منزل مليشيات الاخوان اليوم التانى و ضربو اللى كانو هناك المعفنين العملا اللى بياكلو جبنه نستو بريزدن و فول امريكانا و لو حللنا الرساله اللى فى الجمله دى ان جيبو الرئيس يا فلول امريكا .. و ده طبعا صرح به احد قيادات الاخوان ... قام 7 ماتو منهم 9 اخوان منهم 3 اخوان برضو منهم واحد طلع مصاب و مش اخوان ..... قام الرئيس الاخوان الهمام طالع قلبلنا وشه و و اعد يزعق ... قام قايل تعالو اجتمعو عشان نتفق ع الدستور اللى انا امرت بالاستفتاء عليه ... قام حضر الاجتماع حزب الحريه و العداله و حزب الوسط و حزب النور و كل احزاب التيار الاسلامى و سليم العوا و الاخوان مكى اللى اكتشفنا انهم اخوان و قامو اتفقو مع بعض بقى على انهم يعملو الاستفتاء فى معاده و الاعلان الدستورى اتلغى بس مش اوى يعنى و الدستور الثورى العظيم اوى دى فيه عداله اجتماعيه بالتأكيد و الدليل على انه محددش حد اقصى للاجور و ربط الاجر بالانتاج و فيه حريات لدرجه انك ممكن تحل نقابات و لو اتقبض عليك ممكن تفضل 12 ساعه متعرفش انت لييه مقبوض عليك و لو فى يوم شكلك معجبش بعض الشيوخ ممكن يجى يقيم عليك الحد لانك بتخالف عادات و تقاليد المجتمع من وجهه نظره اما بقى لو جينا ع الديمقراطيه ف متصدقش بقى الاشراف القضائى هيتلغى تماما كمان 10 سنين اهو برضه يكون مشروع النهضه بدأ ينهض و يوصل لكل مكان و اتعمل الاستفتاء .و قام مشرف ع الاستفتاء القضاه الاخوان و راقب الاستفتاء الغريانى اللى عمل الدستور و اللى برضه فى الغالب هيطلع اخوان و قام الاخوان نازلين مصوتين و النتيجه طلعت نعممممممممم للاخوان  .....  .....! .................................... طبعا احنا اعدنا فتره كبيره بعد الانتخابات منكتبش و ده عشان ندى للرئيس فرصته و نسيبه ينفذ خطه ال 100 يوم و لان الريس جاب حكومه قويه ففعلا الرئيس قدر ينفذ و يحقق نسب عاليه جدا من وعود ال 100 يوم و زود عليها كمان ... يعنى مثلا مشكله النظافه اتحلت بنسبه 80% و اكبر دليل على ده اننا بقيتا بتلاقى مبين كل زباله و زباله زباله ..!! و من كتر ما الشوارع بقت نضيفه و مليانه صناديق زباله رئيس الوزرا طلع قانون لو رميت زباله فى الشارع تدفع غرامه. نضافه .... اما بقى عن مشكله  العيش ف دى بقى الحمد للله الناس كلها بتجيب عيش و مدور و شكله جميييل و بخمسين قرش لان عيش المدعوم ده بيجيبوه للمؤاخذه الطيور و البهايم  .... اما بقى مشكله المرور فبسم الله ما شاء الله الطرق فاضيه و الشوارع مفيهاش مخلوق الساعه 4 الفجر اشكر المسؤلين على المجهود العظيم ده والحاجات اللى زادت بقى ان حقوق الشهداء رجعت عليها شهداء زياده و الضرايب هتكون على كل حاجه ناقص يعملو ضريبه لو مشيت ع الارض تدفع ضرائب مشى ع الارض  و قلت الحق اكتب حاجه قبل ما يخلى دخول الفيس بوك بفلوس .. و طبعا انجازات الرئيس وصلت الى انه فسم المصريين لاول مره الى فريقين انه وصل المصريين ان كل واحد بقى يبص فى عين اللى قدامه بخوف لا يكون اخوان ولا سلفى ولا ليبرالى ولا مسيحى !!. من انجازات مرسى انه خلانا نكتشف ان القذافى ممتش . و من انجازاته الحقيقيه انه اكتشفنا ان عندنا معارضه فشله و معندهمش اولويات المرحله على رأى الضاحك النافى " نادر بكار "........ من انجازات مرسى انه فتح صدره للناس فى ميدان التحرير و بعدعا ب 150 يوم هرب فى عربيه مصفحه من الاتحاديه و حط اسوار بينه و بين شعبه !..

____________________________________________________________________________

اعلام :-

الاعلام الخاص كله خاين و عميل و منافق و فلول و مفيش غير قناه الناس و الرحمه و مصر 25 و الجزيره هما بس القنوات المحترمه اللى بتجيب كل الفصائل و كل اطياف المجتمع اخوان سلفيين جهاديين شباب سلفى شباب اخوان شيوخ .. دعاه تنفير .... اما بقى القنوات المغرضه التانيه مبيطلعش فيها فى اى برنامج غير واحد اخوان وواحد من الاطياف الاخرى و ده اكبر دليل على انها قنوات مغرضه و تريد الفتنه و الانقلاب ع الرئيس المتنى الملتحى . و طبعا لان اللى امه امريكيه صاحب نظريه ادركو اللحظه الفارقه و اجروا .. لانه اكتر واحد طلع ع القنوات المغرضه دى فهو من حقه ياخد شرايط التسجيل دى لانه من حقه يعرف الكلام الكدب اللى قاله فى القنوات دى عشان يعرف

يبرر .

فن فن و قله ادب :-  

بعد الحكم بحبس الرداح بسبب سبه الطاهره الشريفه الفنانه القديره اللى بوظت ركب شباب كتيير على مر العصور و صاحبت الفضل على كل شاب مصرى و كل مراهق فى فتره تربعها على عرش السينما المصريه . و طبعا لان الفنانه الهاء تقدم كل ما هو هادف صرحت و قالت انها تسعى لعمل فيلم عن سماحه الاسلام و طبعا هتجيب معاها الرداح عشان يجملو من صوره الاسلام اللى اتشوهت .... قررت جماعه الاخوان المسلمين الغاء اليوتيوب و مواقع التواصل الاجتماعيه تويتر و فيس بوك لانها بتعرض فيديوهات لهم و هما بيقولو كلام عكس اللى بيقلوه دلوقتى مما يسبب لمؤيديهم بعض التخبط يدافعو ولا يصقفو  مما يصعب عليهم ارسال كلام  يرددوه " ماااااااااء ماااااااااااااء ممممااااااااااء " 

قضايا و اراء :-

لان مصر بعد الثوره كان لازم نطهر القضاء و الدخليه و لان عندنا رئيس لكل المصريين فكان لازم يطهر الداخليه و فعلا الرئيس حاسب كل المسؤولين عن الافراج عن الخونه و بتوع الجبنه النستو بتوع البرادعى و  صباحى و عمر موسى و 6 ابليس اللى كانت 6 ملايكه ايام انتخابات الرئاسه .... و طبعا بالنسبه للناس اللى قتلو ف دول ...... الرئيس متكلمش عنهم و الرئيس قال عليهم نازلين يدافعو عن الشريعه و الشرعيه و كمان قال ان دول هما اللى ماتو امال الناس التانيه اللى ماتت دى ايه !! و ايه اللى وداهم هناك ..!!! كانو رايحين عشان يعترضو على تدخل الرئيس فى القضاء !! ما الرئيس بيطهر القضاء و جاب نائب عام خاص له ينفذ اوامره بس النائب العام ده كان عايز يقبض على دول بالعافيه !؟ ..  هو اكيد الرئيس عارف كل حاجه و هو حكيم و يدير البلد بحنكه و عمره ما كان لجلج بس اديله فرصه ........................قدم النائب الخاص استقالته الى المجلس الاعلى للقضاء بس رئيس الجمهوريه افش و قاله جره ايه يا طلعت جرا ايه يا اخى تحرجنى كده و تكسر كلمتى و تخلينى ارجع فى قراراى انى عينتك و رد عليه طلعت و فيها ايه يا ريس ما انت ياما رجعت .. لا يا طلعت انا رجل فى بيتى و كلمتى عمرها ما تنزل الارض ابددااااااااا  .. طلعت يرد ع الرئيس .. خلاص يا ريس كلمتى انا اللى تنزل و هظبت مع مكى نكوسها ازاى الموضوع ده .. مرسى : ايوه كده يا طلعت برافو عليك و مكى ترزى كويس هيخيطلك كلام و بدله كويسه و مكى النائب هيطلع يضحك للناس و يقول اطلاقا و هو ازاى شويه وكلاء نيابه يخلوك تقدم استقالتك و لو سالوه عن اللى معتصمين ادام المحكمه الدستوريه .. هيقول ببلاش تغيرو الموضوع و ده امر مرفوض بس القضاه بيعرفو يخشو انا عرفت قاضى امبارح دخل و طلع سليم الحمدلله و بلاش الكلام اللى يضر بمصلحه البلد ده... و سلملى على استقلال القضاء  

____________________________________________________________________________

رياضه :-

مازال الاهلى بيكسب على طوول و اخد رابع كاس العالم و تقريبا طائر النهضه كان مقصود به ابو تريكه مش اى مشروع تانى

سؤال العدد ...

حد فاهم حاجه ؟؟؟ حد عارف ميين اللى بيحكم ؟؟؟؟ ... لو عرفت الاجابه نورنى الله يخليك